10 июль ҳолатига кўра, Қозоғистонда ўтган бир кеча-кундузда 3695 кишида коронавирус инфекцияси аниқланди, дея хабар бермоқда Tengrinews COVID-19 тарқалишига йўл қўймаслик бўйича идоралараро комиссия маълумотларига таяниб.
Бу республикада пандемия бошидан буён қайд этилган энг юқори суткалик кўрсаткичдир. Бундан аввалги рекорд 9 июлда кузатилган, ўшанда 3130 кишида вирус тасдиқланган эди.
Мамлакатда коронавирус юқтириб олиш бўйича жами 454 825 та ҳолат қайд этилган. Шуларнинг 412 007 нафари соғайган. Ўтган бир кеча-кундузда эса 1857 киши COVID-19’ни енгишга муваффақ бўлган.
Бу орада Қозоғистондаги яна бир ҳудуд — Кўстанай вилояти коронавирус билан боғлиқ вазият оғир бўлган «қизил» зонага киритилди. Бу зонада Нур-Султон, Олмаота, Чимкент шаҳарлари ҳамда Ақмола, Ақтўбе, Атирау, Ғарбий Қозоғистон, Қарағанда, Манғистов ва Павлодар вилоятлари ҳам бўлиб турибди.
Эслатиб ўтамиз, Қозоғистон пойтахти Нур-Султон шаҳрида COVID-19 билан боғлиқ вазият туфайли 2 июлдан карантин чоралари янада кучайтирилди. Янги чекловларга кўра, Нур-Султонда маданий тадбирларни ёпиқ жойларда ўтказиш тақиқланди, онлайн ташкил этиш бундан мустасно. Шунингдек, парк ҳудудида жойлашган барча турдаги очиқ аттракционлар ишламайдиган бўлди.
Изоҳ (0)