Qirg‘izistonning sobiq prezidenti Almazbek Atambayev qotillikda gumon qilinmoqda. Bu haqda Qo‘y-Toshdagi voqealar bo‘yicha davlat komissiyasining faoliyati yakunlari muhokamalari chog‘ida ichki ishlar vaziri Qashqar Junushaliyev ma’lum qildi, deb yozadi “Vecherniy Bishkek”.

Foto: Reuters

Vazirning so‘zlariga ko‘ra, ballistik ekspertiza natijalari “Alfa” maxsus xizmati boshlig‘i o‘rinbosari Usen Niyazbekovning o‘limiga olib kelgan o‘q Almazbek Atambayev nomiga rasmiylashtirilgan karbin miltig‘idan otilganini ko‘rsatdi.

Ichki ishlar vaziri otishmani aynan kim amalga oshirgani hozircha aniqlanmaganligini ta’kidlagan.

Qashqar Junushaliyev keyinroq huquqni muhofaza qilish organlaridan ishdan bo‘shatilgan ichki ishlar vaziri o‘rinbosari Kursan Asanov tomonidan aynan ushbu qurol o‘qsizlantirganini qayd etib o‘tgan.

Eslatib o‘tamiz, Usen Niyazbekov 7-avgust kuni Almazbek Atambayevni guvoh sifatida so‘roq qilinishga majburan keltirish bo‘yicha o‘tkazilgan amaliyot vaqtida otib o‘ldirilgan edi.

Qirg‘iziston sobiq prezidenti huquq-tartibot idoralari xodimlariga nisbatan zo‘ravonlik, ommaviy tartibsizliklarni tashkil qilish, qotillikni tashkillashtirishi, odamlarni garovga olishni tashkil qilish, korrupsiya hamda Qo‘y-Tosh qishlog‘i va Issiqko‘l viloyatidagi yerlarni noqonuniy ravishda o‘zlashtirganlikda ayblanmoqda.