Qirg‘iziston poytaxti Bishkek politsiyasi 2016-yilda Turkiya fuqarolariga noqonuniy ravishda pasportlar berilgani yuzasidan korrupsiya haqidagi modda bo‘yicha sudgacha tergov boshladi, deb yozadi “RBK” Respublika Ichki ishlar vazirligiga tayanib.
“Surishtiruv chog‘ida aniqlanishicha, 2016-yilda Turkiyaning o‘n nafar fuqarosini Qirg‘iziston Respublikasi fuqaroligiga qabul qilish haqida noqonuniy qaror chiqarilgan”, — deyiladi muassasa xabarida.
Qirg‘iziston Jinoyat kodeksining korrupsiya haqidagi 319-moddasi 15 yilgacha muddatga ozodlikdan mahrum qilish shaklidagi maksimal jazoni ko‘zda tutadi. Agar qonunbuzarlik jinoiy guruh manfaatlari yo‘lida amalga oshirilgan bo‘lsa, shunday chora tanlanadi.
Shuningdek, IIV aniqlik kiritishicha, hujjatlarni noqonuniy tarzda taqdim etish qarori mamlakat prezidenti qoshidagi Fuqarolik masalalari bo‘yicha komissiya tomonidan qabul qilingan, davlat rahbari esa qarorni tasdiqlagan. Qirg‘izistonga o‘sha vaqtda Almazbek Atambayev rahbarlik qilgan.
Ayni paytda tergovchilar jinoyatga aloqador shaxslarni aniqlashtirmoqda.
Bir kun avval Bishkek politsiyasi turli vaqtlarda chet elliklarga mamlakat pasportlari berilishini tekshirish bilan shug‘ullanishini ma’lum qilgandi. IIV qayd etishicha, qidirilayotgan shaxslarga, chet elliklarga va uyushgan jinoiy guruhlar a’zolariga hujjatlar taqdim etish bilan bog‘liq korrupsiya va vakolatlarni suiiste’mol qilish holatlari bir necha marta aniqlangan. Xususan, Turkiya hukumati tomonidan 2016-yilgi to‘ntarishga urinishga aloqadorlikda ayblangan O‘rxan Inandi qonunga zid tarzda hujjatga ega bo‘lgan.
Almazbek Atambayev 2011-yildan 2017-yilgacha Qirg‘izistonga rahbarlik qilgan. O‘tgan yilning iyunida sud jinoiy avtoritetning noqonuniy ravishda ozod etilishi haqidagi ish bo‘yicha sobiq prezidentni 11 yil-u 2 oyga ozodlikdan mahrum etgan edi. 2020-yil oxirida Respublika Oliy sudi bu qarorni bekor qildi.
Almazbek Atambayevga qarshi bir nechta jinoiy ishlar qo‘zg‘atilgan, jumladan, u huquq-tartibot idoralari xodimlariga nisbatan zo‘ravonlik, ommaviy tartibsizliklarni tashkil qilish, qotillikni tashkillashtirish, odamlarni garovga olishni tashkil qilish, korrupsiya hamda Qo‘y-Tosh qishlog‘i va Issiqko‘l viloyatidagi yerlarni noqonuniy ravishda o‘zlashtirganlikda ayblangan. Shuningdek, Almazbek Atambayev qotillikda ham gumon qilingan.
Avvaliga Atambayev Bishkekdagi 1-sonli tergov izolyatoriga joylashtirilgan, yanvar oyida esa Qirg‘iziston sobiq prezidenti tergov izolyatoridan koloniyaga o‘tkazilgan.
2021-yil iyunida sobiq prezidentning advokati uning ahvoli og‘ir ekanini aytib, uni zudlik bilan kasalxonaga yotqizishni talab qilgan edi.
Eslatib o‘tamiz, Qirg‘izistonning birinchi va ikkinchi prezidentlari Asqar Akayev va Qurmanbek Bakiyevlar mamlakatdagi eng yirik oltin koni bo‘lgan “Qumtor” ishi bo‘yicha xalqaro qidiruvga berildi.
Izoh (0)