Тожикистонда содир бўлган зилзила оқибатида беш нафар одам ҳалок бўлди

Тожикистонда содир бўлган зилзила оқибатида беш нафар одамнинг ҳалок бўлгани хабар қилинди, деб ёзмоқда «Asia-Plus».

Тожикистон Фавқулодда вазиятлар қўмитасининг хабарига кўра, Тожикобод туманининг «Лангари Шоҳ» жамоатида зилзила оқибатида беш нафар одам ҳалок бўлган. Шунингдек, Рашт туманининг «Хижборак» жамоатида икки нафар вояга етмаган бола жароҳат олиб, касалхонага ётқизилган.

Идора берган маълумотлар бўйича зилзила эпицентри Душанбедан 165 километр узоқликда шимоли-шарқда, Рашт туманидан 21 километр узоқликда шарқда жойлашган.

Ер силкинишларининг кучи 5-6 баллни ташкил қилган, Душанбеда 2-3 балли зилзила кузатилган. Ўзбекистон ҳудудида ҳам 10 июль куни тонгда 3-4 балли зилзила сезилган. Бундан аввал 30 июнь куни Қарши шаҳрида 3 баллик зилзила қайд этилганди.

Дастлабки маълумотларга асосан, ер силкинишлари оқибатида Хиджборак қишлоқ жамоатининг Хазорчашма ва Ярхаб қишлоқларида 7 та аҳоли турар жойи, Рашт тумани «Аскалон» жамоатининг Шархо ва Сари Шухон қишлоқларида 12 та уйга зарар етган.

Тожикистон президенти Эмомали Раҳмоннинг топшириғи бўйича мамлакат бош вазири раҳбарлигида махсус комиссия тузилган. Вазиятни ўрганиш, зарар кўламини таҳлил қилиш учун Фавқулодда вазиятлар қўмитаси, Давлат моддий захирарлари бўйича агентлик, Қурилиш ва архитектура қўмитаси, Фанлар академиясининг Геология, сейсмомустаҳкам қурилиш ва сейсмология институти, Геология бош бошқармасининг раҳбарлари зилзила содир бўлган ерларга борган.