Европа Иттифоқи коронавирусга қарши вакциналарнинг ножўя таъсирлари ҳақида маълум қилди

Европа дор-дармон агентлиги (EМА) хавфсизлик қўмитаси коронавирусга қарши вакцина олган беморларда кузатиладиган ножўя таъсирлар бўйича олиб борилаётган тадқиқотларининг дастлабки натижаларини сарҳисоб қилди.

Гап Европа Иттифоқи ҳудудида фойдаланиш учун расман тасдиқланган вакциналар ҳақида кетмоқда.

Қўмита ҳисоботида қайд этилишича, Comirnaty ва Spikevax вакциналари (Pfizer / BioNTech ва Moderna томонидан ишлаб чиқарилган мРНК вакциналари) жуда кам ҳолларда миокардит (юрак мушагининг яллиғланиши) ва перикардит (юракни ўраб турган мембрананинг яллиғланиши)га олиб келиши мумкин. Ушбу касалликларни вакциналарнинг ножўя таъсирлари рўйхатига қўшиш тавсия этилади.

Евроиттифоқ мамлакатларида тахминан 177 миллион доза Pfizer / BioNTech вакцинаси ишлатилган, улардан сўнг 145 та миокардит ва 138 та перикардит ҳолати қайд этилган. Moderna вакцинасининг тахминан 2 миллион дозаси юборилган, эмланганлар орасида иккала юрак хасталиги бўйича жами 19 та ҳолат аниқланган.

Johnson & Johnson компаниясининг Janssen препарати Европа регулятори томонидан капилляр оқиш синдроми (қон плазмаси қон томирлари деворлари орқали тўқималарга тушади) билан касалланган одамларга тавсия этилмайди. Ушбу ноёб касаллик Janssen вакцинасини қабул қилганларнинг атиги уч нафарида қайд этилган, улардан икки нафари вафот этган.

EМА Гиен-Барре синдроми бўлган одамларни AstraZeneca билан эмлашдан олдин огоҳлантиришни таклиф қилди. Гиен-Барре кам учрайдиган аутоиммун касаллик бўлиб, асаб тугунларини яллиғлантиради ва мушакларнинг кучсизланишига, оғриққа, карахтликка ва ҳаракатланишда қийинчиликларга олиб келади.

Оғир ҳолатларда Гиен-Барре синдроми нутқ ва ютиниш қобилиятини сусайтириши мумкин. Синдром ҳар қандай ёшдаги одамларга таъсир қилиши мумкин, аммо у кўпинча катталар ва эркакларда учрайди.

AstraZeneca вакцинасидан фойдаланиш тасдиқланган пайтда ушбу синдром эҳтимолий ножўя реакция сифатида қайд этилганди. EМА касаллик ва инъекция ўртасида боғлиқликни ҳали топмаган, аммо тиббиёт ходимлари ва беморлар учун рисолаларда синдром ҳақида огоҳлантиришни тавсия қилди.

Европа регуляторининг ҳисоботида Россия вакциналари, шу жумладан, «Спутник V» препарати ҳақида маълумотлар мавжуд эмас, чунки улар Европа Иттифоқида рўйхатдан ўтмаган.