Туркманистонда ҳаво ҳароратининг кескин кўтарилиши сабабли темир йўл ва ҳаво транспорти ҳаракати чекланди. «Темир йўллар» ОАЖ веб-сайтида ҳамда Туркманистон фуқаролари авиачипталар буюртма қиладиган Saray дастурида тегишли эълонлар пайдо бўлди, деб ёзади «Интерфакс».
Фото: Central Asia
Чекловлар кун ўрталарида, ҳаво энг кўп қизиб кетган пайт (47 даража) амалга ошириладиган парвозларга таъсир кўрсатди. Ашхобод—Амударё йўналиши бўйлаб ҳаракатланадиган поэзд ҳаракати тўлиқ тўхтатилди, дея хабар беради Туркманистон темир йўл компанияси сайти.
Туркманистон синоптикларининг прогнозига кўра, шу ҳафта мамлакатда ҳаво ҳарорати 47 даражагача кўтарилиши кутилмоқда, бу билан метеорологик кузатувлар тарихида июль ойидаги иссиқлик янги рекорд ўрнатади. Бундай прогнозлар муносабати билан президент Гурбангули Бердимуҳамедов 2 июль куни ҳукуматга ушбу даврда фуқароларнинг соғлиғини ҳимоя қилиш учун зарур бўлган барча чораларни кўришни буюрганди. Шу билан бирга, синоптиклар ҳафта охирида Туркманистонда ҳарорат 35 даражагача пасайиши кутилаётганини тахмин қилмоқда.
«Интерфакс»нинг Европа оммавий ахборот воситаларига таяниб, хабар беришича, Финляндия, Норвегия ва Швецияда ҳам метеорологлар сўнгги кунларда рекорд даражада юқори ҳароратни қайд этди.
Ўтган ҳафта охирида Финляндиянинг Лапландия провинциясидаги Кево қўриқхонасида ҳаво ҳарорати 33,5 даражани ташкил этган, бу 1914 йилдан буён кузатилган энг юқори ҳарорат.
Норвегия Метеорология институти Қутб доирасига яқин Салтдал коммунасида 34 даражани қайд этди. Бу йил бошидан буён Норвегияда қайд этилган энг юқори ҳарорат, шунингдек мамлакат тарихида кузатилган энг юқори ҳароратдан атиги 1,6 даража паст.
Қўшни Швеция аҳолиси ҳам июнь ойида иссиқдан азият чекди. Швециялик экология фаоли Грета Тунбергнинг Twitter’да ёзишича, Стокгольмда 2019 ва 2020 йил июнь ойларида ҳам жуда иссиқ бўлган, унинг фикрига кўра, бу тасодиф эмас, балки жиддий иқлим ўзгаришининг натижаси. Хабарлар шуни кўрсатадики, Швецияда 2021 йилнинг июнь ойи бутун метеорологик кузатувлар тарихидаги энг иссиқ июнь ойлари ичида учинчиси бўлди.
Шунингдек, Ўзбекистонда 6—8 июль кунлари Эрон ҳудудларидан иссиқ ҳаво массаларининг кириб келиши туфайли жазирама иссиқ кучайиши кутилаётгани, ушбу кунларда ҳаво ҳарорати иқлимий меъёрлардан 5-8 даражага юқори бўлиши маълум қилинганди. Ўзбекистон 6—8 июль кунлари термик депрессия таъсири остида бўлиши кутилмоқда.
Аввалроқ Канадада юқори ҳаво ҳарорати 85 йиллик рекордни янгилагани, аномал иссиқ ҳаво оқибатида 200 дан ортиқ одам ҳалок бўлгани, кейинчалик иссиқ ҳаво қурбонларининг сони 500 кишидан ошгани, аномал иссиқлик ортидан мамлакатда ўрмон ёнғинлари бошлангани ҳақида хабарлар берилганди.
