«Толибон» сабабли Афғонистондаги Россия бош консулхонаси ўз фаолиятини тўхтатди

Афғонистон шимолидаги вазият кескинлашиб бораётгани сабабли Мозори-Шариф шаҳридаги Россия бош консулхонаси ўз фаолиятини вақтинча тўхтатди. Бу ҳақда Россия президентининг Афғонистон бўйича махсус вакили, Ташқи ишлар вазирлигининг иккинчи Осиё департаменти директори Замир Кабулов маълум қилди, деб ёзади «РБК».

«Кўплаб консуллик идоралар вазият аниқ бўлгунга қадар ўз ишларини вақтинча тўхтатди. Вазият ўзгарувчан. Хабарларда айтилганидек, Афғонистон хавфсизлик кучлари жуда кўп ҳудудларни қўлдан берди. Табиийки, бу асабийликни келтириб чиқаради», — дея изоҳ берган у.

Кабуловнинг сўзларига кўра Россия ва Коллектив Хавфсизлик Шартномаси Ташкилоти (КХШТ) вазият юзасидан тожик-афғон чегарасининг хавфсизлигини таъминлаш учун Тожикистонга ёрдам беришда давом этади.

Россия президенти матбуот котиби Дмитрий Песков ҳам Афғонистондаги вазият беқарорлашганини таъкидлаган.  Унинг аниқлик киритишича, минтақага Россия ҳарбийларини юбориш ҳали режада йўқ, аммо вазият янада кучайиб кетса, «керакли қарорлар қабул қилинади».

Песковнинг сўзларига кўра, ҳозир Афғонистондаги вазият «афсуски, яхши томонга ривожланмаяпти». Унинг таъкидлашича, АҚШ ҳарбийлари ва уларнинг иттифоқчилари Афғонистондан чиқиб кетга бошлагандан сўнг, бу давлатдаги вазият «хавотирни кучайтирмоқда».

«Вазият ривожланиб бориши билан бизнинг ҳарбийларимиз ва чегарачиларимиз керакли қарорларни қабул қилади. Биз диққат билан кузатмоқдамиз ва афсус билан айтишимиз мумкинки, беқарорлик юз бермоқда», — деган Кремль вакили.

Россия Тожикистоннинг Афғонистон билан чегарасида ўз ҳарбий контингентини кенгайтиришни режалаштиряптими ёки йўқми деган саволга Дмитрий Песков аниқ жавоб бермаган: «Сизга қўшимча контингент ҳақида айта олмайман».

Россия қўшинларини Афғонистонга киритиш масаласи кўриб чиқиляптими, ушбу мавзу маҳаллий ҳукумат билан муҳокама қилиняптими, деган саволларга Песков «Йўқ, бу борада ҳеч қандай мунозаралар йўқ» деб жавоб берган.

Афғонистондаги вазият АҚШ ва НАТОнинг мамлакатда 2001 йилдан бери бўлиб турган қўшинларини олиб кетиш бошлангач кескинлашди. Қуролли кучларни олиб чиқиш 1 майдан бошланди, 2 июлда Америка ҳарбийлари мамлакатдаги асосий базаси — Кобул яқинидаги Баграм авиабазасини тарк этгани маълум бўлди.