Жефф Безос Amazon бош директори лавозимидан кетди

Forbes талқини бўйича дунёнинг энг бой кишиси Жефф Безос Amazon раҳбари лавозимидан кетганидан сўнг эътиборини бошқа лойиҳаларга қаратмоқчи, шунингдек, у тез орада коинотга парвоз қилади.

Жефф Безос 5 июль куни ўзи асос солган Amazon компанияси бош директори лавозимидан кетмоқда. Лавозим Amazon Web Services компанияси собиқ раҳбари Эндрю Жессига топширилади. Бироқ Безос бошқарув кенгаши раиси бўлиб қолади.

Кетиш учун Безос танлаган сана рамзий маънога эга, шу куни асосий бизнес лойиҳаси ташкил этилганига роппа-роса 27 йил тўлди.

Amazon —  китоблар сотадиган веб-сайт сифатида иш бошлаган ва қизиқ устида Cadabra деб номланишига сал қолган. Ўтган йиллар давомида компания нафақат онлайн тижорат доирасини кенгайтирди, балки янги бозор ўринларини ҳам ўзлаштирди — 200 миллион обуначига эга бўлган онлайн кинотеатрдан тортиб «булутли» ҳисоблаш сервислари ёки маиший электроника ишлаб чиқаришгача. Умуман олганда, компания 40 га яқин турли хил бренд ва шўъба корхоналарга эгалик қилади.

1997 йилда Amazon акциялари биржага чиқарилганда 18 доллардан сотилган эди, ҳозир уларнинг ҳар бири нархи 3,5 минг доллардан юқори, бош қароргоҳи Сиэтлда бўлган компаниянинг умумий капитализацияси 1,7 триллион доллардан ошади.

Amazonда 1,3 миллионга яқин киши ишлайди. Иш шароитларининг қийинлиги учун доимий равишда танқид қилинса-да, компания соатига камида 15 доллар маош тўлайди — бу федерал минимумдан икки баравар кўп.

Безоснинг ўзи 177 миллиард доллар бойлиги билан Forbes’нинг дунёдаги энг бой ишбилармонлари рўйхатида етакчилик қилмоқда.

Эндрю Жессига директорлик лавозимини топширгандан сўнг 57 ёшли Безос компаниянинг раиси бўлиб қолади ва акцияларнинг 10 фоизидан кўпроғига эгалик қилишда давом этади. У компаниянинг истиқболли маҳсулотларига эътиборини қаратмоқчи ва бошқа активларига, шу жумладан, хайрия фондлари, The Washington Post газетаси ва Blue Origin космик компаниясига кўпроқ вақт ажратиш ниятида.

Жефф Безос 20 июль куни Blue Origin компаниясининг космик кемасида укаси Марк Безос билан суборбитал парвозни амалга оширади. Шунингдек, Безос 82 ёшли америкалик учувчи аёл Уолли Фанкни ўзи билан бирга коинотга учишга таклиф қилди.