Тожикистон президенти Эмомали Раҳмон 5 июль куни тожик-афғон чегарасидаги вазият кескинлашгани туфайли Хавфсизлик кенгашининг фавқулодда йиғилишини ўтказди. Бу ҳақда Asia-Plus хабар берди.
Учрашувда Хавфсизлик кенгашининг доимий аъзолари, ҳарбий тузилмалар ва ҳуқуқни муҳофаза қилувчи органларнинг раҳбарлари иштирок этган.
Йиғилишда чегара ҳудудларида хавфсизликни таъминлаш ва давлат чегарасида қўриқлаш чораларини кучайтириш масалалари муҳокама қилинган.
Чегара қўшинлари қўмондони Ражабали Раҳмонали ҳамда ички ишлар вазири Рамазон Раҳимзода чегарадаги вазият юзасидан ҳисобот берган.
«Давлат раҳбари Эмомали Раҳмон Афғонистон ва Тожикистон чегараларидаги вазиятнинг кескинлашганини эътиборга олган ҳолда давлат ва чегарадаги халқ хавфсизлигини таъминлаш учун аниқ чораларни кўриш ҳақида буйруқ берди», – дейилган Тожикистон президентининг расмий веб-сайтида.
Шунингдек, йиғилишда кучишлатар тизимлар вакилларига давлат чегарасида ҳимояни кучайтириш, керакли ҳудудларга қўшимча қўшин юбориш вазифаси ҳам юкланган.
Қайд этилишича, Тожикистон президенти чегарани бузиб ўтиш ҳолатларига катта эътибор қаратиш, мазкур ҳаракатларнинг трансмиллий жиноят эканлиги ҳақида огоҳлантириш ишларини олиб бориш, террорчилик, экстремизм ва гиёҳванд моддаларнинг ноқонуний савдосига қарши курашиш юзасидан ҳам топшириқлар берган.
Йиғилиш якунида Эмомали Раҳмон мудофаа вазирига 20 минг нафар ҳарбий резерв вакилларини Тожикистон ҳамда Афғонистон чегарасини мустаҳкамлашга юборишни тайинлаган.
Аввал «Толибон» билан тўқнашувдан сўнг 1000 дан ортиқ афғонистонлик ҳарбийлар Тожикистонга чекингани, Шавкат Мирзиёев ва Эмомали Раҳмон Афғонистондаги кескинликнинг кучайиши билан боғлиқ вазиятни муҳокама қилгани ҳақида хабарлар берилган.
Шунингдек, 3 июль куни «Толибон» билан тўқнашувдан кейин 300 дан ортиқ афғонистонлик ҳарбийлар Тожикистонга чекинган, ундан олдин «Толибон» Афғонистоннинг Тожикистон билан чегарадаги ҳудудини эгаллаб олган ҳамда тожик—афғон чегарасидаги вазият кескин деб баҳоланган. Кейинчалик Афғонистонда ҳукумат қўшинлари «Толибон» жангариларини мамлакат шимолидаги бир нечта туманлардан сиқиб чиқарган. АҚШ давлат котиби Энтони Блинкен Афғонистондан АҚШ қўшинлари олиб чиқиб кетилгач, мамлакатда ҳокимият тепасига «Толибон» ҳаракати вакиллари келиши мумкинлигини истисно қилмаганди.
Афғонистондан НАТО қўшинларини олиб чиқиш 29 апрелда бошланган, АҚШ ва «Толибон» ўртасида тузилган келишувга биноан жараён кузда якунланиши керак. Бугунга қадар Германия ва Италия Афғонистондан ўз қўшинларини олиб чиқишни якунлаган.
Изоҳ (0)