Ўзбекистонда давлат харидлари шаффофлигини таъминлашга оид Президент қарори қабул қилинди

«Давлат харидлари шаффофлигини таъминлаш ва самарадорлигини оширишга доир қўшимча чора-тадбирлар тўғрисида»ги Президент қарори қабул қилинди, деб хабар беради Telegram’даги «Ҳуқуқий ахборот» канали.

Қарорга кўра, 2021 йил 5 июлдан тегишли (24 та) корпоратив буюртмачилар:

• давлат харидларини амалга оширишда харид қилиш тартиб-таомилларини ўтказиш тўғрисидаги эълонлар ва давлат харидлари натижалари тўғрисидаги ахборотни махсус ахборот портали ҳамда ОАВда жойлаштиради;
• товарларнинг (ишларнинг, хизматларнинг) қиймати БҲМнинг 25 минг баравари (6,125 миллиард сўм) миқдоридан ошган ҳолларда, харидга доир техник топшириқлар ва тендер ҳужжатларини комплекс экспертизадан ўтказиш учун Иқтисодий тараққиёт ва камбағалликни қисқартириш вазирлиги ҳузуридаги «Лойиҳалар ва импорт контрактларини комплекс экспертиза қилиш маркази» давлат унитар корхонасига киритади.

Шунингдек, мазкур корпоратив буюртмачилар учун индивидуал тарзда Президент ва ҳукумат қарорларига мувофиқ белгиланган давлат харидларини тўғридан-тўғри ёки тендер савдоларини ўтказмасдан амалга оширишнинг мавжуд тартиблари бекор қилинади.

Қарорга кўра:

• етказиб берувчиларнинг дастлабки малака танловини ўтказиш бўйича идоравий норматив-ҳуқуқий ҳужжатлар ишлаб чиқилади;
• омбор ва транспорт логистикасини бошқариш тизимидаги жараёнларни автоматлаштириш орқали «Э-омбор» товар-моддий ресурслар ҳаракатини ҳисобга олиш электрон тизими жорий этилади.

Қарор билан, шунингдек, Давлат харидлари очиқ ва шаффоф амалга оширилишини таъминлаш бўйича республика комиссияси тўғрисидаги низом тасдиқланган.

Шу билан бирга, давлат харидларини амалга ошириш жараёнлари алоҳида тартибда назорат қилинадиган айрим корпоратив ва бюджет буюртмачилари рўйхати ҳам тузилган:

Аввалроқ Бухородаги бюджет ташкилотларидан бири деярли 65 млрд сўмлик давлат харидларини тендерсиз амалга оширгани, Урганч тумани СЭО томонидан ўтказилган тендерда раҳбарнинг укасига тегишли корхона ғолиб чиққани, «Трест-12» Олий Мажлис Қонунчилик палатаси биносини тендерсиз таъмирлаши тўғрисида хабар берилганди.