Озодбек Назарбеков Халқаро пресс-клубнинг жонли эфирида коронавирусга қарши вакцина олди (видео)

Ўзбекистон маданият вазири Озодбек Назарбеков Халқаро пресс-клубнинг жонли эфирида коронавирусга қарши вакцина олди, деб хабар беради ССВ матбуот хизмати.

Маданият вазири эмланишдан сўнг ўзини яхши ҳис қилаётганини маълум қилган.

Барчамизга маълумки, 2020 йил бошида инсониятга умуман нотаниш бўлган касаллик — COVID-19 вируси билан юзлашдик. Ўтган вақт мобайнида давлатимиз раҳбари бошчилигида бутун халқимиз бу касаллик билан курашдик.

Бугунги кунга келиб эса, давлатимизда касалликка қарши вакцинация жараёнларини тўлақонли ташкил этишда ҳеч қандай муаммо бўлмайди. Энг муҳими, мавжуд вакциналар тўлиқ текширувдан ўтган.

Бизнинг олдимизда эса иккита йўл бор. Бири карантинда уйда ўтириб, заруратда тиббий ниқоблар билан кўчага чиқиш, иккинчиси вирусга қарши эмланиб, одатдаги, гўзал турмуш тарзимизга қайтиш.

Айтиш мумкинки, инсон туғилгандан бошлаб, умри давомида 14 та вакцина оларкан. COVID-19 вирусига қарши эмлашни 15-вакцина деб қабул қилишимиз керак. Биз бугун барчани уйга қамалиб, хавотир ичида яшашга мажбур қилган бу вирусдан фақат эмланибгина халос бўла оламиз.

Бугун «Ўзбекистон 24» телаканалида жонли эфирда ташкил этилган Халқаро пресс клубда кўрган бўлсангиз, кўпчилик қаторида биз ҳам вакцина қабул қилдик. Ҳозирда ўзимни яхши ҳис қиляпман. Тиббиёт ходимларининг берган тавсияларига амал қилсак, барчаси енгил кечади.

Ўйлаймизки, вакцина қабул қилиш, одатдаги ҳаётимизга қайтишнинг ягона чорасидир.

Озодбек Назарбеков, маданият вазири

Кўрстувда, шунингдек, «Бугун мамлакатимизда аҳолини коронавирусга қарши эмлаш ишлари қандай кетаяпти?», «Айни пайтгача нечта одам касалликка қарши эмланди?», «Асосан қайси вакциналар одамлар орасида машҳур бўлмоқда?», «Уларнинг орасида энг яхшиси, самарадори қайси бири?» каби саволларга жавоб берилган.

Telegram’даги TashkentLand канали тўғридан-тўғри эфир вақтида Озодбек Назарбеков Россиянинг «Спутник V» вакцинаси билан эмланганига эътибор қаратган. «Аҳолининг асосий қисми поликлиникалар, савдо марказлари ва корхоналарда фақат Хитой вакцинаси билан эмланмоқда, аммо танланганлар учун ‘Спутник V’ бор эканда?», дейилади хабарда.

Аввалроқ халқ таълими вазири Шерзод Шерматов коронавирусга қарши ўзбек—хитой вакцинаси билан эмлангани тўғрисида хабар берилганди.