Amazon асосчиси ва сайёранинг энг бой кишиси Жефф Безос 82 ёшли америкалик учувчи аёл Уолли Фанкни ўзи билан бирга коинотга учишга таклиф қилди. Бу ҳақда миллиардер ўзининг Instagram саҳифасида маълум қилган, деб ёзади «РБК».
Безоснинг хабарида айтилишича, Фанк «Меркурий-13» гуруҳидаги энг яхши учувчилардан бири бўлган. (1960 йилларда аёл космонавтларни АҚШнинг биринчи учувчили космик дастури бўйича парвозларга тайёрлаш дастури).
«Ҳеч ким у каби узоқ кутмаган. Тренинг тугаганига қарамай, дастур бекор қилинган ва 13 аёлдан ҳеч бири коинотга учмаган. Вақт бўлди. Уолли, жамоага хуш келибсиз. 20 июль куни биз билан фахрий меҳмон сифатида парвоз қилишингиздан мамнун бўламиз», — деб ёзган миллиардер.
Безоснинг постига илова қилинган видеода тадбиркор Фанкка яқинлашиб келаётган парвозни тасвирлаб беради ва бунга аёл нима дейишини сўрайди. Учувчи аёл унга шундай жавоб беради: «Нима дейишим мумкин. Бу менинг ҳаётимда юз берган энг яхши ҳодиса!».
NASA дастури бекор қилингандан сўнг Фанк парвоз бўйича инструктор бўлиб ишлаган, сўнгра Федерал авиация бошқармасининг авиаҳалокатлар бўйича текширув ўтказадиган биринчи аёл терговчиси бўлган.
Жефф Безос коинотга 20 июль куни парвоз қилади.
Британиялик миллиардер Ричард Бренсон космосга шу йилнинг 11 июлида — Безосдан тўққиз кун олдин учади. Бу ҳақда Virgin Galactic компаниясининг Twitter’ида эълон қилинди.
«11 июль куни биринчи учувчили парвозимизни ва янги коинот асрининг бошланишини томоша қилиш учун бизга қўшилинг. Парвоз кунини ҳисоблаш учун вақт кетди», — дейилган хабарда.
Эълонга илова қилинган қисқа видеода Unity суборбитал космик кеманинг олти экипаж аъзосини кўриш мумкин. Улар орасида учувчилар Дейв Маккай ва Майкл Масуччи, астронавтлар Сириша Бандла, Килин Беннет ва Бетте Мозес, шунингдек, компания раҳбари Ричард Бренсон бор.
Virgin Galactic — дунё миқёсида космик туризм соҳасидаги биринчи оммавий компания. 2020 йил ноябрь ойида компания 2021 йилнинг биринчи чораги охирида Virgin Group асосчиси Ричард Брансон космосга учишини, шундан сўнг парвозлар учун чипталарни сотиш бошланишини эълон қилди.