Қашқадарё вилоятида Қарши тумани ҳокимлиги захирасида турган бўш ерни сотишга уринган шахс қўлга олинди. Бу ҳақда Бош прокуратура ҳузуридаги Департамент хабар берди.
Фото: Бош прокуратура ҳузуридаги Департамент
Маълум қилинишича, Департамент ходимлари томонидан ўтказилган тезкор тадбирда М.Б. исмли шахс фуқаро Д.нинг ишончига кириб, унга ҳокимлик захирасида турган 12 сотих бўш ер майдонини танишлари орқали уй-жой қуриш учун олиб беришни ваъда қилган. Бунинг эвазига у 70 миллион сўмни фирибгарлик йўли билан олган вақтида ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Маълумот учун, Ўзбекистон Президентининг 2021 йил 8 июндаги «Ер муносабатларида тенглик ва шаффофликни таъминлаш, ерга бўлган ҳуқуқларни ишончли ҳимоя қилиш ва уларни бозор активига айлантириш чора-тадбирлари тўғрисида»ги фармонига асосан қишлоқ хўжалигига мўлжалланган ерлар очиқ электрон танлов якунларига кўра, фақат ижара ҳуқуқи асосида ажратилади, қишлоқ хўжалигига мўлжалланмаган ерлар мулк ҳуқуқи ва ижара ҳуқуқи асосида электрон онлайн-аукцион орқали реализация қилинади.
Аввалроқ Самарқандда ҳокимиятдаги танишлари орқали 40 сотих ерни 19,5 минг долларга сотишга уринган собиқ ИИО ходими қўлга олингани, Тошкентда ер олиб беришни ваъда қилиб, фуқародан 52 800 доллар олган шахс ушлангани, Андижонда 100 гектар ер ажратиб бериш эвазига 128 минг доллар пора олган мансабдор шахсларга суд ҳукми ўқилгани тўғрисида хабар берилганди.
