Qashqadaryo viloyatida Qarshi tumani hokimligi zaxirasida turgan bo‘sh yerni sotishga uringan shaxs qo‘lga olindi. Bu haqda Bosh prokuratura huzuridagi Departament xabar berdi.
Ma’lum qilinishicha, Departament xodimlari tomonidan o‘tkazilgan tezkor tadbirda M.B. ismli shaxs fuqaro D.ning ishonchiga kirib, unga hokimlik zaxirasida turgan 12 sotix bo‘sh yer maydonini tanishlari orqali uy-joy qurish uchun olib berishni va’da qilgan. Buning evaziga u 70 million so‘mni firibgarlik yo‘li bilan olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Ma’lumot uchun, O‘zbekiston Prezidentining 2021-yil 8-iyundagi “Yer munosabatlarida tenglik va shaffoflikni ta’minlash, yerga bo‘lgan huquqlarni ishonchli himoya qilish va ularni bozor aktiviga aylantirish chora-tadbirlari to‘g‘risida”gi farmoniga asosan qishloq xo‘jaligiga mo‘ljallangan yerlar ochiq elektron tanlov yakunlariga ko‘ra, faqat ijara huquqi asosida ajratiladi, qishloq xo‘jaligiga mo‘ljallanmagan yerlar mulk huquqi va ijara huquqi asosida elektron onlayn-auksion orqali realizatsiya qilinadi.
Avvalroq Samarqandda hokimiyatdagi tanishlari orqali 40 sotix yerni 19,5 ming dollarga sotishga uringan sobiq IIO xodimi qo‘lga olingani, Toshkentda yer olib berishni va’da qilib, fuqarodan 52 800 dollar olgan shaxs ushlangani, Andijonda 100 gektar yer ajratib berish evaziga 128 ming dollar pora olgan mansabdor shaxslarga sud hukmi o‘qilgani to‘g‘risida xabar berilgandi.
Izoh (0)