Самарқанд вилоятидаги текстиль корхоналарининг бирида ишлаган 19 ёшли қиз тунги навбатчиликда зўрлангани юзасидан жиноят иши қўзғатилганди. Вилоят прокуратураси ушбу жиноят иши юзасидан қўшимча маълумотларни тақдим этди.
Маълум қилинишича, М.Б.нинг Ф.А. ўзининг Spark автомашинасида унинг қўлларини боғлаб, мажбурлаб номусига теккани тўғрисидаги мурожаати юзасидан ўтказилган терговга қадар текширув натижасига кўра 12 июнь куни жиноят иши қўзғатилган.
23 июнь куни вилоят прокурори Равшан Машарипов ва сенатор Фармон Тошев бошчилигида вилоят прокуратураси ва ИИБ раҳбарларининг соҳавий ўринбосарлари, тармоқ раҳбарлари, ИИБ терговчилари, жабрланувчи, айбланувчи, уларнинг вакиллари ва ҳимоячилари, кенг жамоатчилик ва оммавий ахборот воситалари вакиллари иштирокида муҳокама қилинди.
Муҳокама жараёнида вилоят прокурори жиноят иши юзасидан тергов ҳаракатлари малакали ўтказилмаганини, муқаддам шунга ўхшаш ҳолатларда йўл қўйилган камчиликлар ҳали ҳам такрорланиб келаётганини, айбдор аниқ бўлса-да, ҳолат ижтимоий тармоқларда ёритилгандан сўнг айбланувчига нисбатан 21 июнь куни эҳтиёт чораси танланганини таъкидлади.
Қайд этилишича, вилоят прокурори томонидан жиноят иши юзасидан тергов ҳаракатларини давом эттириш прокуратура органлари терговчиларига топширилиб, шаҳар ИИБ ходимларининг ҳаракатлари бўйича ички ишлар вазири номига хизмат текшируви тайинланди ва иш прокурорнинг шахсий назоратига олинди.
Аввалроқ Қашқадарёда қизнинг мастлигидан фойдаланиб, унинг номусига теккан шахсга аввал жиноят иши қўзғатиш рад этилиб, сўнгра иш қайта очилгани, Сурхондарёда аёл зўрланганини айтиб, ёрдам сўрагани, ҳолат юзасидан экспертиза тайинлангани ҳақида хабар берилган эди.
Изоҳ (0)