DXX Qibrayda ikki gektar yerni 1 mln dollarga sotishga uringan tadbirkorni qo‘lga oldi (video)

DXX va Iqtisodiy jinoyatlarga qarshi kurashish departamenti Toshkent viloyati boshqarmasi hamkorligida o‘tkazilgan tezkor tadbirda Qibray tumanidagi “Tuzel” massivida joylashgan 2 gektar yerni 1 million dollarga sotmoqchi bo‘lgan xususiy tadbirkor qo‘lga olindi. Bu haqda “O‘zbekiston 24” telekanalida ma’lum qilindi.

Tergovga qadar tekshiruv davomida ushbu tadbirkor muntazam ravishda noqonuniy yer oldi-sotdisi bilan shug‘ullanib kelgani aniqlangan.

Firibgar kelishilgan pulning 10 ming dollarini olayotgan vaqtida ashyoviy dalillar bilan ushlangan.

Shuningdek, “Navoiy savdo” AJ rahbari mazkur jamiyatga tegishli 1 gektar yerni aksiyadorlarni xabardor qilmasdan noqonuniy ravishda 29,7 ming dollarga sotishga uringani aniqlandi. U Navoiy viloyati DXX boshqarmasi va Departament xodimlari tomonidan avans sifatida 50 million so‘m va 1,5 ming AQSh dollarini olayotganida qo‘lga olingan.

O‘zbek davlat yer tuzish ilmiy-loyihalash instituti Andijon viloyati filiali xodimi sholichilik bilan shug‘ullanish uchun Qo‘rg‘ontepa tumani hokimligi zaxirasidan 8 gektar yerni yuqori lavozimlarda ishlovchi tanishlari orqali ajratib, tegishli hujjatlarni rasmiylashtirib berish evaziga fuqarodan 10,4 ming dollar talab qilgan. U so‘ralgan puldan 1000 dollarini olgan vaqtda DXX va Departament xodimlari tomonidan ushlangan.

Yuqoridagi holatlar yuzasida Jinoyat kodeksining tegishli moddalari bilan jinoyati ishlari qo‘zg‘atilgan bo‘lib, tergov harakatlari doirasida mazkur noqonuniy holatlarga aloqador bo‘lgan boshqa shaxslarni aniqlash bo‘yicha zarur chora-tadbirlar ko‘rilmoqda.

Avvalroq Chinozda tadbirkorga 12 800 dollar evaziga 1,3 gektar yer ajratib berishni va’da qilgan tuman hokimligi xodimi ushlangani, Toshkent viloyatida hokim qarorini soxtalashtirib, aslida yo‘q bo‘lgan uylarni 100 ming dollarga sotishga uringan shaxslar qo‘lga olingani to‘g‘risida xabar berilgandi.