Ўзбекистон Республикаси Президентининг «Республика ҳудудларида мебелсозлик саноатини ривожлантиришга қаратилган чора-тадбирлар тўғрисида»ги қарори қабул қилингани ҳақида хабар берилганди.
«Халқ сўзи Online» ушбу қарор юзасидан Иқтисодиёт ассамблеяси раиси Мухтор Умаров билан суҳбатлашди. Хусусан, раис «Мебеллар нархи неча фоизгача тушади?» деган саволга қуйидагича жавоб берди.
«Қарор билан мебеллар нархини 50 фоизгача арзонлаштиришимиз мумкин бўлади. Сабаби экспорт ва импорт қилишдаги хом ашёларни 0 қийматида олиб келишни бошлаймиз. Хом ашё учун сарфланадиган харажатни ҳам 50 фоизгача давлатдан субсидия тариқасида олиш мумкин.
Иккинчиси экспортдаги харажатлар ҳам, яъни логистика харажатлари ҳам давлат томонидан қоплаб берилади. Шу жиҳатдан биз 50 фоизгача режалаштиряпмиз ва буни кластер қилиш асносида нарх-наволарни тушириб борамиз. Яъни қанча кўп маҳсулот ишлаб чиқарилса, унинг таннархи шунча тушиб боради», — дейди Умаров.
Унинг қайд этишича, Ўзбекистонда тадбиркорлар учун йўлкира энг асосий харажатлардан бири ҳисобланади. Бу учун берилаётган енгиллик натижасида мебелсозлик соҳасида ютуқларга эришиш мумкин.
Бундан аввал Ўзбекистон мебель саноатида хом ашё сифатида фойдаланиладиган дарахт турлари плантациялари барпо этилиши ҳамда Ўзбекистонда мебель маҳсулотларини ишлаб чиқаришга ихтисослашган кичик саноат зоналари ташкил этилиши ҳақида хабар берилганди.
Изоҳ (0)