АҚШ президенти Жо Байден Американинг жисмоний ва юридик шахсларига сармоя киритиш тақиқланган Хитой компанияларининг кенгайтирилган рўйхати тўғрисидаги фармонни имзолади. Бу ҳақда Оқ уй веб-сайтига таяниб «РБК» хабар берди.
Хабарга кўра, «қора рўйхат»га Вашингтон наздида Хитой ҳарбий-саноат комплексига алоқаси бўлган 59 та ташкилот киритилган. Улар орасида дунёдаги энг йирик телекоммуникацион компаниялардан Huawei, China Mobile Communications Group Co., Ltd., China Telecommunications Corporation ва бошқа алоқа корхоналари бор.
Шунингдек, рўйхатдан Хитой давлат ҳарбий саноат компанияси (CASIC), Хитой аэрокосмоик илмий-технология корпорацияси (CASC), Хитой миллий ядровий корпорацияси (CNNC), Хитой миллий офшор нефть корпорацияси (CNOOC) ҳам жой олган.
Фармонга кўра, америкаликларга «АҚШ ва унинг иттифоқчилари хавфсизлиги ёки демократик қадриятларини бузадиган» компанияларнинг акцияларини сотиб олиш ёки сотиш тақиқланади. Шунингдек, Оқ баёнотида айтилишича, Хитой кузатув, репрессия ва инсон ҳуқуқларини бузиш учун технологиялардан фойдаланаётган бўлиши мумкин.
Қайд этилишича, тақиқ 2021 йил 2 августдан кучга киради.
Байденнинг ушбу фармони ундан олдинги президент Дональд Трамп даврида қабул қилинган чораларни тўлдиради. 2021 йилнинг январь ойи бошида Дональд Трамп администрацияси Хитойнинг 10 та компаниясини «қора рўйхат»га киргизган. Улар орасида Xiaomi компанияси ҳам бор эди. Hi-Tech.Mail.ru’нинг ёзишича, тақиқ ноябрь ойида кучга кириши керак бўлган, бироқ Xiaomi компанияси суд орқали уни бекор қилишга эришган.
Изоҳ (0)