Россия ҳукумати COVID-19’га мажбурий тестдан ўтказилган муҳожирларни қурилиш майдонларида ишлаш учун темир йўл транспортида олиб келишга рухсат бериш имкониятини кўриб чиқмоқда. Бу ҳақда бош вазир ўринбосари Марат Хуснуллинга таяниб, «Интерфакс» хабар берди.
«Манфаатларни мувозанатлаш ҳаракатида биз йирик компаниялар томонидан ишчи кучини жалб қилиш ва мувофиқлаштириш механизмини соддалаштиришга келишиб олдик. Регламентга ўзгартириш киритилди. Ҳозир улар фақат самолётда келиши мумкин, биз темир йўл орқали келиш имкониятини кўриб чиқдик, яъни бу плюс бўлади. Шунингдек, мажбурий тест жорий қилиш ва эмлаш таклифини билдириш ҳам кўриб чиқилмоқда», — деди Хуснуллин.
У ушбу чоралар ишчи кучи етишмовчилигининг ҳеч бўлмаганда бир қисмини қоплашга ёрдам беришига умид билдирди. Расмийнинг сўзларига кўра, ҳозирда мамлакатда камида 1 миллион қурувчи етишмаяпти, Москва ҳудудининг ўзига 100 мингга яқин ишчи керак.
Март ойининг бошида Россия Қурилиш вазирлиги мамлакат қурилиш майдонларига 1,2 миллионга яқин ишчи етишмаётганини маълум қилган. Ушбу муаммони ҳал қилиш мақсадида Қурилиш вазирлиги бўш ўринларни тўлдириш учун муҳожирларни олиб кириш механизмига ўзгартириш киритмоқда. Вазирлик раҳбари Ирек Файзуллин Россияда кадрлар тайёрлаш ва мутахассисларни қайта тайёрлаш бўйича ўқув марказларини очиш режалаштирилганини таъкидлаган.
Шунингдек, маҳбусларни қурилиш майдончаларига жалб қилиш имконияти ҳам кўриб чиқилмоқда.
Ўз навбатида Хуснуллин ишчи кучининг етишмаслиги, бошқа муаммолар қатори, чегараларнинг ёпиқлиги ва хорижлик ишчиларни жалб қила олмаслик билан боғлиқлигини таъкидлади.
Мавзуга доир:
- Мутахассислар меҳнат муҳожирлари йўлидаги тўсиқларни олиб ташлаш орқали жаҳон ЯИМни икки баравар ошириш мумкинлиги айтди
- Россияда йирик лойиҳаларни амалга ошириш учун меҳнат муҳожирлари етишмаётгани маълум қилинди
- Россияда ноқонуний муҳожирларни легаллаштириш ҳақидаги қонун лойиҳаси ишлаб чиқилмоқда
Изоҳ (0)