Donald Tramp administratsiyasi Xitoyning 10 ta kompaniyasini “qora ro‘yxat”ga kirgizdi, deb xabar beradi IXBT.
Foto: IXBT
Ushbu kompaniyalar AQSh Mudofaa vazirligi tomonidan “Xitoyning kommunistik harbiy kompaniyalari” ro‘yxatiga kiritilgan. “Qora ro‘yxat”ga kiritilgan kompaniyalar orasida Xiaomi ham o‘rin olgan.
Hozircha Xiaomi bilan bog‘liq vaziyat 2019-yilda Huawei duch kelgan vaziyatdan yaxshiroq. Aftidan, Huawei va Xiaomi turli darajadagi sanksiyalar ro‘yxatiga kiritilgan.
Xiaomi’ga Google va Qualcomm kabi kompaniyalar bilan savdo qilish va hamkorlik taqiqlanmagan, shu sababli Xiaomi hamda Redmi smartfonlariga Android va SoC Snapdragon’lar o‘rnatilishidan xavotirlanmasa bo‘ladi.
Ammo amerikalik investorlarga Xiaomi’ga sarmoya kiritish taqiqlangan. Bundan tashqari, amerikalik investorlar 2021-yilning 11-noyabriga qadar o‘zlariga tegishli Xiaomi aksiyalarini sotib yuborishi kerak. Bularning barchasi kompaniya aksiyalari narxining tushishiga olib keladi.
Eslatib o‘tamiz, 2020-yilning iyul oyida AQSh Huawei va Xitoyning boshqa texnologik kompaniyalari uchun viza cheklovlarini joriy qilgan edi. Davlat departamentining ma’lum qilishicha, bu kompaniyalar inson huquqlarining buzilishida ishtirok etayotgan mamlakatlar rasmiylariga yordam ko‘rsatmoqda.
