АҚШ президенти Жо Байден 3 июнь куни дунёдаги коррупцияга қарши курашни мамлакат миллий хавфсизлиги соҳасидаги муҳим вазифалардан бири сифатида белгилайдиган меморандумни имзолади. Бу ҳақда президент маъмурияти вакилига таяниб, «ТАСС» хабар берди.
«Ушбу меморандум билан АҚШ президенти коррупцияга қарши курашни расман АҚШ Миллий хавфсизлигининг асосий вазифаси сифатида белгиламоқда. Президент сайловолди ташвиқоти чоғида мазкур курашга содиқ қолишини билдирган эди. Ҳукумат ва унинг ҳамкорлари коррупцияга қарши курашиш чораларини қандай қилиб кучайтириши, мувофиқлаштириши бўйича маъмуриятга 200 кун ичида таҳлил ўтказиш ҳамда ҳисобот ва тавсиялар тақдим этиш топширилди», — деди маъмурият вакили.
Унинг таъкидлашича, ушбу меморандум коррупцияни молиялаштиришга қарши курашиш ва бу учун жавобгарликни таъминлаш учун халқаро ҳамкорликни назарда тутади.
«Коррупцияга қарши мазкур кенг кўламли ёндашув АҚШнинг ҳар бир идораси томонидан амалга оширилади. Ишончимиз комилки, меморандумнинг амалга оширилиши дунёда коррупцияга қарши курашишда янги қатъиятли чораларга олиб келади», — деди расмий.
Унинг сўзларига кўра, АҚШ ҳукумати криптовалютанинг ноқонуний молиялаштириш воситаси сифатидаги таъсирини ўрганмоқда. Шу муносабат билан криптовалютани назарда тутадиган ноқонуний молиялаштиришга қарши қонунчиликни такомиллаштириш устида иш олиб борилмоқда.
Изоҳ (0)