Шимолий Корея Меҳнат партияси (ШКМП)да янги КХДР раисининг биринчи ўринбосари, биринчи котиб лавозими жорий қилиниши ва мазкур лавозим Ким Чен Иннинг синглиси Ким Ё Чжонга топширилиши мумкин. Бу ҳақда «Рёнҳап» агентлиги хабар берди.
Хабарга кўра, биринчи котиб партия бош котибининг ўринбосарига тегишли ваколатлар доирасида иш кўради.
«Фавқулодда ҳолатлар юз берганда, хусусан, Ким Чен Иннинг соғлиғида муаммолар юзага келса, раҳбарлик ваколатлари Ким Ё Чжонга ўтади ва у Ким Чен Иннинг ўғли улғайгунига қадар раҳбар вазифасини бажаради», — деб ёзмоқда Жанубий Корея собиқ ташқи ишлар вазири Ли Чон Сокга таяниб «Рёнҳап».
Ли Чон Сокнинг қайд этишича, биринчи котибни сайлаш жараёни партиянинг навбатдаги қурултой чақириши билан амалга ошади. Номзод партия марказий қўмитасининг ялпи мажлисида лавозимга тайинланади.
Шунингдек, Ли Чон Сок КХДР етакчисининг ёрдамчиси Чо Ён Вон ҳам мазкур лавозимни эгаллаши мумкин бўлган номзодлардан бири эканини таъкидлаган. Бироқ Жанубий Корея собиқ ташқи ишлар вазири ёрдамчининг Ким Чен Ин оиласига алоқадор эмаслигини инобатга олиб, Чо Ён Воннинг биринчи котиб лавозимини эгаллашининг эҳтимоли жуда паст эканлигини тахмин қилган.
«Биз Чо Ён Вон КХДР раисининг ўринбосари лавозимини эгалламайди деб аниқ айта олмаймиз ва Ким Чен Индан кейинги раҳбар учун барқарорлик режимини сақлаш муҳим», — деган Ли Чон Сок.
CNN телеканали ҳукумат ҳужжатига асосланган ҳолда биринчи котиб лавозимини ким эгаллаши ҳали номаълум экани ҳақида хабар берган. Бироқ экспертлар мазкур лавозим бўш эканини инобатга олган ҳолда уни Чо Ён Вон ҳамда КХДР Вазирлар кенгаши раиси Дим Док Хун эгаллаши мумкинлигини тахмин қилган.
Шимолий Корея ОАВ маълумотлари бўйича Чо Ён Вон ҳамда Ким Док Хун 2021 йилда мамлакат миқёсида расмий ташрифлар ўтказган ва аввал Ким Чен Иннинг ўзи раҳбар сифатида ўтказган йиғилишларга раислик қилган.
Айрим таҳлилчилар эса сиёсий бюронинг доимий аъзоларигина янги жорий қилинган лавозимни эгаллашини прогноз қилган. Кённам университети қошидаги Шимолий Корея тадқиқотлари олий мактаби профессори Рим Ир Чхол Ким Чен Иннинг синглиси келажакда унинг ўрнини эгаллай оладиган номзод эмаслигини айтган.
Ким Ё Чжон Корея Меҳнат партиясининг марказий кенгаши бўлимларидан бирига раҳбарлик қилади.«Рёнҳап» агентлигининг ёзишича, партиянинг январь ойидаги қурултойида мамлакатда раисдан кейинги иккинчи раҳбар, яъни биринчи котиб лавозимини жорий қилиш масаласидаги қоидалар кўриб чиқилган. Шунингдек, йил бошида Ким Чен Ин партиянинг бош котиби лавозимига сайланган.
Аввал Ким Чен Иннинг 24 кундан буён омма олдида кўриниш бермагани хабар қилинганди.
Изоҳ (0)