Чехия парламенти юқори палатасининг ташқи ишлар, мудофаа ва хавфсизлик қўмитаси мамлакат президенти Милош Земанга нисбатан импичмент эълон қилиш тўғрисидаги қарорини Сенатга тақдим этди. Бу ҳақда қўмита раҳбари Павел Фишер Twitter’да маълум қилди, деб ёзади «РБК».
«Бугун Милош Земаннинг президентлик вазифасини бажара олмаслиги тўғрисида қарор қабул қилган сенаторларнинг уюшган гуруҳи Чехия Республикаси Сенати Халқаро алоқалар, мудофаа ва хавфсизлик қўмитаси деган фитначи номга эга», — деб ёзган Фишер.
Фишер аниқлик киритишича, Сенат Земаннинг истеъфоси сабабини унинг «Врбетицедаги портлаш билан боғлиқ инқирозли вазиятда ўзини тутиши» деб билади.
Чехиянинг Врбетице қишлоғидаги қурол-аслаҳа омборларида 2014 йил октябрь ойида портлашлар содир бўлган. Ўшанда икки киши вафот этган.
2021 йилнинг апрель ойида Чехия расмийлари ушбу воқеада Россия махсус хизматларини айблади. Бунинг ортидан Чехия 18 нафар россиялик дипломатни мамлакатдан чиқариб юборди. Шунингдек, Чехия бош вазири Андрей Бабиш Евроиттифоқ мамлакатлари раҳбариятини Чехия ҳукумати билан бирдамлик рамзи сифатида ҳеч бўлмаганда бир нафардан Россия дипломатларини чиқариб юборишга чақирди.
Май ойи ўрталарида Чехия президенти Врбетицадаги портлашлар сабабини камомадни яширишга уриниш деб атади. Шунингдек, у воқеа сабабининг дастлабки версияси ўқ-дориларни сақлашда бепарволикка йўл қўйилиши эканини эслатиб ўтди. Бош вазир ва адлия вазири эса воқеада фақат Россиядан гумон қилинаётганини таъкидлади.
Шундай вазиятда Россия Ташқи ишлар вазирлиги Чехиянинг Врбетицадаги портлашларга оид текширувини чалкаш деб атади ва бирор тайинли натижага эришиш ҳам даргумонлигини айтди.
Изоҳ (0)