Ўзбекистондаги йўл ҳаракати соҳасидаги муаммоларни ўрганиш ва уларни бартараф этиш бўйича ишчи гуруҳ тузилди
Ўзбекистон Ички ишлар вазирлиги матбуот хизмати 1 июнь куни республикада йўл ҳаракати соҳасидаги муаммоларни комплекс ўрганиш ва уларни бартараф этиш бўйича идоралараро ишчи гуруҳ тузилганлигини эълон қилди.
Хабарда қайд этилишича, республикада транспорт воситаларидан фойдаланиш хавфсизлиги қоидаларини қўпол равишда бузиш ҳолатлари юқорилиги, йўл инфратузилмасидаги жиддий муаммолар йўл-транспорт ҳодисаларини келтириб чиқараётганлиги, оқибатда кўплаб инсонларнинг тан жароҳат олиши, уларнинг бевақт вафот этаётганлиги ҳолатлари кўпайиб бормоқда.
Гуруҳ таркибига ҳукумат, Ички ишлар, Транспорт, Молия вазирликлари, Автомобиль йўллари қўмитаси ва бошқа мутасадди идоралар ва ташкилотларнинг раҳбар ва малакали мутахассислари киритилган.
Гуруҳ томонидан йўлларда ҳаракат хавфсизлигини таъминлаш ва йўл-транспорт ҳодисаларининг барвақт олдини олишнинг бугунги кундаги ҳолати комплекс равишда ўрганилиб, хорижий тажриба ва илмий ёндашувларни қўллаш асосида норматив-ҳуқуқий ва манзилли ташкилий-амалий чоралар ишлаб чиқилади.
Алоҳида эътибор йўл инфратузилмаси билан боғлиқ жиддий муаммолар — йўлларнинг ҳолати, пиёдалар ўтиш жойи, йўл белгилари, тартибга солинмаган чорраҳалар ва бошқаларга қаратилиб, уларни тубдан яхшилаш бўйича ҳар томонлама чоралар кўрилади.
«Йўл ҳаракати хавфсизлиги бўйича аҳолини қийнаётган муаммолар ўрганилиб, кўриладиган комплекс чора-тадбирлар ҳақида жамоатчиликка ахборот берилади ҳамда фуқаролар томонидан билдирилган таклифлар синчковлик билан ўрганиб чиқилади», — дейилади ИИВ хабарида.
Оммавий ахборот воситалари ва жамоатчилик вакиллари ишчи гуруҳ таркибига киритиладими-йўқми, унга таклифларни қандай киритиш мумкинлиги ҳақида маълумот берилмаган.
Маълумот учун, Ўзбекистонда 1 ҳафта (24 май 31 май) давомида содир бўлган ЙТҲларда 20 га яқин киши вафот этди.
Жумладан:
- Сурхондарёнинг Шўрчи туманида, тахминан, соат 02:15 да «КамАЗ» ва Damas иштирокидаги ЙТҲ оқибатида Damas ҳайдовчиси ва унинг ёнида бўлган йўловчи ҳалок бўлган, шунингдек, Damas’нинг икки йўловчиси (жумладан, 2-синфда ўқийдиган қиз) тан жароҳати олиб, реанимацияга ётқизилган;
- Тошкентдаги Бунёдкор шоҳкўчасининг Чилонзор туманидан ўтган қисмида, тахминан, соат 04:45 да Spark ҳайдаб кетаётган 36 ёшли Ф.Ю. бошқарувни йўқотиб, қарама-қарши йўналишни ажратиб турувчи тўсиққа бориб урилган ва шифокорларнинг уринишларига қарамай, касалхонада вафот этган;
- Тошкент вилоятининг Ангрен шаҳрида, тахминан, соат 09:00 да дастлаб Nexia-3 автомобили йўлни ажратиб турувчи бетон тўсиққа урилган, шундан сўнг шу йўналишда орқадан ҳаракатланиб келаётган машиналар секинлашган вақтда меъёридан кўп юк ортилган MAN юк машинаси тормози ишламай қолиб, учта Lacetti, Nexia-2 ва Cobalt билан тўқнашган (Lacetti’лардан бири ёниб кетган), ҳодиса оқибатида етти киши ҳалок бўлган, 14 киши тан жароҳати олиб, касалхонага ётқизилган;
- Хоразмнинг Янгиариқ туманида, тахминан, соат 17:30 да 39 ёшли ҳайдовчи қоидага хилоф равишда ўнг томондан қувиб ўтишга уриниш вақтида йўл четидаги олти нафар 11-синф битирувчисини уриб юбориб, ариққа ағдарилган. Ҳодиса оқибатида уч нафар ўқувчи ҳодиса жойида, бир нафари касалхонада вафот этган, яна икки ўқувчи оғир аҳволда шифохонада ётибди;
- Наманганнинг Поп туманида, тахминан, соат 18:00 да ҳайдовчи Ж.Ж. Nexia автомобилида ҳаракатланаётиб, бошқарувни йўқотган ва бетон тўсиққа урилиб, пастликка тушиб кетган. Оқибатда ҳайдовчи ҳамда икки йўловчи — 20 ёшли А.Р. ва 35 ёшли А.Қ. тан жароҳатлари олиб, туман шифохонасига мурожаат қилган, яна бир йўловчи Я.Б. эса тан жароҳатлари сабабли вафот этган.
- Тошкент ҳалқа йўли ва Бунёдкор шоҳкўчалари кесишмасидаги айланма кўприк устида автобуслардан бири пиёдалар ўтиш йўлагидан ўтаётган фуқароларга йўл бериб тўхтаган пайтда, унинг ортидан келаётган бошқа бир Isuzu ҳайдовчиси ўз вақтида тормозланишни амалга ошира олмай, унинг ортига келиб урилган. Оқибатда пиёдалардан бири оғир аҳволда шифохонга юборилган. Бироқ жабрланувчи шифохонага етиб бориши билан вафот этган.
- Самарқанд вилоятининг Пахтачи туманида 31 май куни соат 12:21 ларда Самарқанд—Бухоро—Туркманбоши автомобиль йўлининг 124-километрида Р.А. бошқарувидаги Nexia русумли автомашина пиёдалар ўтиш йўлакчасидан ўтаётган пиёдаларга йўл бериш учун тўхтаган. Шу йўналиш бўйлаб орқа томонидан оралиқ масофани сақламасдан келаётган Isuzu юк машинаси Nexia’га келиб урилган. Енгил машина ичида бўлган йўловчи кўрсатилган муолажаларга қарамай тиббиёт бўлимида вафот этган.
