Шавкат Мирзиёев «Ангор Сурхон ғурури» кластерида ғалла ҳосилини кўздан кечирди

Президент Шавкат Мирзиёев Ангор туманидаги «Ангор Сурхон ғурури» кластерида бўлиб, ғалла ва ғўза ривожини кўздан кечирди.

Ушбу кластернинг умумий ер майдони 11 минг гектардан зиёд. Шунинг 4 минг 870 гектарида ғалла етиштирилмоқда. Бу йил Россиядан касалликларга чидамли ғалла навлари келтириб экилган. Гектарига 80 центнердан ҳосил олиш кутиляпти.

Давлат раҳбари комбайнни бошқариб, ғалла ўрди.

4 минг 656 гектарда пахта қўшқатор экилган. Калифорния усулида суғориш натижасида сув сарфини 50 фоизга тежашга эришилмоқда.

Президент соҳа мутахассислари билан суҳбатда пахтани қўшқатор усулда экишни жанубий ҳудудларда оммалаштириш ва бу орқали юқори ҳосил олиш мумкинлигини қайд этди.

Кластерда сабзавот ва дуккакли экинлар ҳам етиштирилади.

Бундан аввал Шавкат Мирзиёев Шеробод қуёш электр станцияси қурилишига тамал тошини қўйгани ҳамда Шавкат Мирзиёев Шерободдаги замонавий иссиқхона ва анор қадоқлаш корхонаси билан танишгани ҳақида хабар берилганди.