Тошкентдаги Magic City кўнгилочар боғига ташриф буюрувчилар сони кўпайгани боис баъзи кўчаларда ҳаракат вақтинча чекланади

Тошкентдаги баъзи кўчаларда транспорт ҳаракати чекланади, дея хабар бермоқда шаҳар ИИББ.

Қайд этилишича, Тошкентда 1 июнь – Халқаро болаларни ҳимоя қилиш куни муносабати билан ўтказилаётган тадбирларга, шунингдек, янги очилган Magic City кўнгилочар масканига ташриф буюрувчи фуқаролар сони кўплиги сабабли транспорт воситаларининг тирбандлиги юзага келган.

Шу муносабат билан қуйидаги кўчаларда транспорт воситаларининг ҳаракатланиши вақтинчалик чекланади:

• Сеул кўчаси – Фурқат кўчасидан Бунёдкор кўчасигача;
• Фурқат кўчаси – Ислом Каримов кўчасидан Шаршара кўчасигача;
• Бобур кўчаси – Шаршара кўчасидан Ўрикзор кўчасигача.

«Ҳурматли фуқаролар ва пойтахтимиз меҳмонлари! Magic City ва бошқа кўнгилочар масканларга ташриф буюрганингизда транспорт воситаларингизни бошқа транспорт воситаларининг ҳаракатланишига халақит бермайдиган масофада қолдиришингизни ҳамда кўнгилочар масканга пиёда ташриф буюришингизни сўраймиз», – дейилади ИИББ ахборотида.