Чеченистон раҳбари Рамзан Қодиров ҳудудий амалиёт штаби билан бўлган учрашувда коронавирусга қарши вакцина олишдан бош тортганларни энг охирги навбатда эмлаш ташаббуси билан чиқди, деб ёзмоқда Meduza.
Қодировнинг таъкидлашича, Чеченистон аҳолисидан кимгадир вакцинациянинг ижобий жиҳатлари тушунарсиз бўлса, улар ўзининг саволларига жавоб олиш учун участка шифокори ёки имомига мурожаат қилиши мумкин.
«Агар улар шунда ҳам эмланишга рози бўлмаса, у ҳолда улар охирги бўлиб вакцина олади. Кислород етишмаслиги қанчалик қўрқинчли эканини бир ҳис қилиб кўришсин», — деди Қодиров.
Қодиров минтақада эмлаш ниҳоятда суст кечаётганини ҳам алоҳида қайд этиб ўтди: вакцинация бўйича Россияда Шимолий Кавказ федерал округи охирги, Чеченистон эса округ бўйича тўртинчи ўринда турибди.
Расмий маълумотларга кўра, охирги ҳафтада Чеченистонда коронавирус билан кунлик касалланишлар сони ўртача 10 тани ташкил қилмоқда. Ҳудудда пандемия бошидан буён 12 мингдан ортиқ аҳоли коронавирус билан касалланди, уларнинг 133 нафари вирус қурбонига айланди.
Бугунги кунда Чеченистонда жами 1,5 миллион аҳолининг 45 минг нафари коронавирусга қарши эмланди.
Аввалроқ Bloomberg баъзи вакциналар мамлакатларга пандемиядан тезроқ чиқишга ёрдам бераётганини маълум қилди. Бунинг сабабларидан бири вакциналарнинг ҳар хил турларидан фойдаланиш бўлиши мумкин. Moderna ёки Pfizer/BioNTech томонидан ишлаб чиқилган РНК-вакциналар (рибонуклеин кислотаси асосидаги вакциналар) инфекциянинг юқишини пасайтиришда ёрдам бериб, касалланишни яхшироқ тўхтатади.
Шунингдек, Россия соғлиқни сақлаш вазири Михаил Мурашко COVID-19’га нисбатан жамоавий иммунитет сентябрга келиб шаклланишини маълум қилди.
Изоҳ (0)