Россия президенти Владимир Путин Беларусдаги ҳамкасби Александр Лукашенкодан Америка раҳбари Жо Байден билан унинг рухсатисиз Беларусдаги вазиятни муҳокама қилгани учун узр сўради. Бу ҳақда Лукашенконинг ўзи Беларусь парламенти аъзолари билан учрашувда айтиб ўтди.
«Путин виждонан иш қилди. Менга қўнғироқ қилиб, Беларусни рухсатсиз муҳокама қилгани учун узр сўради. Мен унга Байден билан бу мавзуда гаплашгани учун раҳмат айтаман. Беларусь ҳақида гаплашаверсин, ҳеч бўлмаганда, Байден мамлакатимиз қаерда жойлашганини билиб олади», — деди Лукашенко.
Лукашенко ўз нутқи давомида америкалик ҳамкасбини Беларусдаги «вазиятни ўрганиб чиқмаганликда» айблади. Лукашенко Россия ва Қўшма Штатлар раҳбарлари кейинги учрашувда Украина ва Беларусь масаласини муҳокама қилиш ниятида эканига ишора қилди. Аммо унинг фикрига кўра, буни Минскда амалга оширган яхшироқ. «Мен очиқчасига таклиф қилмоқчиман: агар улар Беларусь муаммоларини муҳокама қилмоқчи бўлса, бизнинг мамлакатга келсин. Швейцарияда ўтириб, Путинга Беларусь муаммоларидан дарс бериш кулгили», — деди Лукашенко.
Шунингдек, Кремль Путин ва Лукашенконинг учрашуви 28 май куни Сочида бўлиб ўтишини маълум қилди.
Россия президентининг матбуот котиби Дмитрий Песков журналистларга учрашув 28 май куни бўлиб ўтишини тасдиқлади ва музокаралар давомида матбуот учун ҳеч қандай чиқиш ёки баёнот режалаштирилмаганини қўшимча қилди.
Матбуот котибининг сўзларига кўра, бўлажак учрашувда икки мамлакат раҳбарлари Беларусь иқтисодиётининг аҳволи ҳақида гаплашади. Россиядан ёрдам олиш тўғрисида муҳокама ўтказиш республика раҳбарининг бу масалани қандай кўтаришига боғлиқ бўлади.
Парламентдаги чиқишида Лукашенко Путин билан музокаралар чоғида асосан иқтисодиёт мавзуси муҳокама қилинишини айтди, аммо аниқ масалаларни келтирмади.
Апрель охирида Москвада Путин ва Лукашенко 4 соатлик музокара ўтказган эди. Таъкидланишича, улар иқтисодий масалаларни муҳокама қилган.
Изоҳ (0)