Rossiya sog‘liqni saqlash vaziri Mixail Murashko COVID-19’ga nisbatan jamoaviy immunitet sentabrga kelib shakllanishini ma’lum qildi, deb yozadi Meduza.
Foto: “Daryo”
Koronavirusga qarshi emlash, Murashkoning so‘zlariga ko‘ra, reja bo‘yicha bormoqda. Shu bilan birga, u 9-may holati bo‘yicha Rossiya bo‘ylab necha kishi emlangani haqida ma’lumot keltirib o‘tmadi.
Rossiyada 18 yoshdan oshgan fuqarolarni ixtiyoriy ravishda koronavirusga qarshi ommaviy emlash 18-yanvardan boshlandi.
6-may kuni Rossiya prezidenti Vladimir Putin bilan bo‘lib o‘tgan yig‘ilishda bosh vazir o‘rinbosari Tatyana Golikova Rossiyada 13,4 million kishi vaksinaning bitta dozasi, yana 9,4 million kishi esa ikkita dozasi bilan to‘liq emlanganini ma’lum qildi. Rossiyaning jami fuqarolari soni esa 146,2 million kishini tashkil qiladi (2021-yil 1-yanvar holatiga ko‘ra).
O‘sha majlisda Putin ba’zi hududlarda emlash va testdan o‘tkazish sur’atlari pasayayotganini aytib, bunga yo‘l qo‘ymaslik uchun emlash mumkin bo‘lgan joylarda, shu jumladan, dacha posyolkalarida ko‘chma vaksinatsiya punktlarini tashkil qilishni taklif etdi.
Aprel oxirida Bloomberg Rossiya hukumatidagi manbalariga tayanib ma’lum qilishicha, norasmiy statistikaga ko‘ra, Rossiyada koronavirusning uchinchi to‘lqini boshlangan. Mamlakatda koronavirus tarqalishini sekinlashtirish uchun may oyidagi bayramlar oralig‘i dam olish kunlari deb e’lon qilingan edi.
Jamoaviy immunitet — katta qismida immunitet paydo bo‘lishi sharofati bilan, aholining infeksiya tarqalishiga qarshi turishi. Agar infeksiyaning yetarli miqdorda ta’sirchan nishonlari, ya’ni immunitetsiz odamlar boshqa bo‘lmasa, yangi kasallanish holatlarining ehtimoli kamayadi. Shunda jamoaviy immunitetga erishilgani haqida aytiladi.
Ma’lumot uchun, O‘zbekistonda 9-may holati ko‘ra, jami emlanganlar soni 1 040 074 kishini tashkil etmoqda.
