Checheniston rahbari Ramzan Qodirov hududiy amaliyot shtabi bilan bo‘lgan uchrashuvda koronavirusga qarshi vaksina olishdan bosh tortganlarni eng oxirgi navbatda emlash tashabbusi bilan chiqdi, deb yozmoqda Meduza.
Qodirovning ta’kidlashicha, Checheniston aholisidan kimgadir vaksinatsiyaning ijobiy jihatlari tushunarsiz bo‘lsa, ular o‘zining savollariga javob olish uchun uchastka shifokori yoki imomiga murojaat qilishi mumkin.
“Agar ular shunda ham emlanishga rozi bo‘lmasa, u holda ular oxirgi bo‘lib vaksina oladi. Kislorod yetishmasligi qanchalik qo‘rqinchli ekanini bir his qilib ko‘rishsin”, — dedi Qodirov.
Qodirov mintaqada emlash nihoyatda sust kechayotganini ham alohida qayd etib o‘tdi: vaksinatsiya bo‘yicha Rossiyada Shimoliy Kavkaz federal okrugi oxirgi, Checheniston esa okrug bo‘yicha to‘rtinchi o‘rinda turibdi.
Rasmiy ma’lumotlarga ko‘ra, oxirgi haftada Chechenistonda koronavirus bilan kunlik kasallanishlar soni o‘rtacha 10 tani tashkil qilmoqda. Hududda pandemiya boshidan buyon 12 mingdan ortiq aholi koronavirus bilan kasallandi, ularning 133 nafari virus qurboniga aylandi.
Bugungi kunda Chechenistonda jami 1,5 million aholining 45 ming nafari koronavirusga qarshi emlandi.
Avvalroq Bloomberg ba’zi vaksinalar mamlakatlarga pandemiyadan tezroq chiqishga yordam berayotganini ma’lum qildi. Buning sabablaridan biri vaksinalarning har xil turlaridan foydalanish bo‘lishi mumkin. Moderna yoki Pfizer/BioNTech tomonidan ishlab chiqilgan RNK-vaksinalar (ribonuklein kislotasi asosidagi vaksinalar) infeksiyaning yuqishini pasaytirishda yordam berib, kasallanishni yaxshiroq to‘xtatadi.
Shuningdek, Rossiya sog‘liqni saqlash vaziri Mixail Murashko COVID-19’ga nisbatan jamoaviy immunitet sentabrga kelib shakllanishini ma’lum qildi.
Izoh (0)