Қирғизистон парламентида 2015 йилда қабул қилинган «Чегарадаги ваколатли шахслар тўғрисида»ги қонунга ўзгартириш киритиш лойиҳаси жамоатчилик муҳокамасига қўйилди. Бу ҳақда Kloop хабар берди.
Хабарга кўра, бир қатор депутатлар қонунга ўзгартириш киритишни таклиф қилмоқда. Унга кўра, давлат чегараларини ҳимоя қилиш органи фуқароларга ўқотар ва ҳарбий қуролларни бериши мумкин бўлади. Ҳозирги кунда чегараларни ҳимоя қилиш билан Миллий хавфсизлик давлат қўмитаси шуғулланади.
Шу билан бирга, фақат чегара вакили мақомига эга бўлган фуқароларгина қурол олиши мумкинлиги таъкидланган. Амалдаги қонунчиликка кўра, фуқаролар бундай мақомни давлат чегарасини қўриқлаш соҳасидаги органнинг қарори билан олиши мумкин.
Шунингдек, қонунга биноан ушбу мақом чегараолди ҳудудларида доимий яшайдиган ва меҳнат шартномаси асосида ишлайдиган фуқароларга берилади. Қурол-яроғ масаласидаги ўзгаришлар билан биргаликда қонун лойиҳасида чегара хизматчилари томонидан қурол олиб юриш ва улардан фойдаланиш учун тўловлар ва машғулотлар назарда тутилган.
Амалдаги қонунда чегарадаги ваколатли фуқаролар учун ҳарбий қурол берилиши назарда тутилмаган. Қонунга кўра, фуқаролар давлат чегараларини қўриқлашда чегарачиларга ёрдам бериш учун жалб қилинади.
Чегара муаммоси Қирғизистонда бир неча йилдан бери долзарб бўлиб келмоқда. Чегарадаги баҳсли ва тавсифланмаган ҳудудлар туфайли Қирғизистон ва бошқа давлатлар аҳолиси ўртасида тўқнашувлар бўлиб туради.
Сўнгги марта апрель ойи охирида Қирғизистон ва Тожикистоннинг чегараолди вилоятлари аҳолиси ўртасидаги зиддият икки мамлакат ҳарбийларининг қуролли тўқнашувига айланиб кетганди. Қирғиз-тожик чегарасидаги низоларда Қирғизистоннинг 36 фуқароси ҳалок бўлди, 200 га яқин киши жароҳат олди. Тожикистон эса 19 киши ҳалок бўлгани, 87 киши жабрлангани ҳақида хабар берди. Можарода 300 дан ортиқ уйлар ва инфратузилма объектлари вайрон қилинган, айримлари ёниб кетган. 29 апрель оқшомида томонлар низони тўхтатиш ва чегарадан ҳарбий кучларни олиб кетиш тўғрисида келишиб олди, аммо эртаси куни яна отишма бошланди. 30 апрель куни тушдан кейин навбатдаги сулҳга эришилди. 3 май куни Қирғизистон ва Тожикистон ўз ҳарбий кучларини чегара чизиғидан олиб чиқишни якунлади.
Изоҳ (0)