Лукашенко Ryanair самолётининг Минскка фавқулодда қўниши юзасидан биринчи марта изоҳ берди

Беларусь президенти Александр Лукашенко Ryanair самолётининг фавқулодда Минскка қўниши ҳамда Nexta Telegram каналининг собиқ бош муҳаррири Роман Протасевич ҳибсга олиниши билан боғлиқ ҳодисада қонун доирасида ҳаракат қилган. Бу ҳақда Лукашенконинг ўзи парламент вакиллари билан учрашувда айтиб ўтди, деб ёзади «РБК».

«Самолёт БелАЭС яқинида ортга қайтарилган. Агар тўсатдан атом электр станциясининг хавфсизлик тизимлари тўлиқ жанговар шай ҳолатга келтирилганда нима бўларди? Мен барча халқаро қоидаларга мувофиқ одамларни ҳимоя қилиб, қонуний ҳаракат қилдим», — деди президент.

Учрашувда Лукашенко Ryanair самолёти миналаштирилгани тўғрисида хабар Швейцариядан келганини айтди.

Лукашенконинг сўзларига кўра хабар келиб тушганидан сўнг, экипаж самолёт эгалари ва Вильнюсдаги аэропорт билан маслаҳатлашиб, самолётни Минскка қўндиришга қарор қилган.

Президент, шунингдек, МиГ-29 қирувчи самолёти Ryanair’ни қўнишга мажбур қилгани ҳақидаги хабарларни рад этди ва уларни «мутлақо ёлғон» деб атади. Унинг сўзларига кўра, қирувчининг вазифаси алоқани таъминлаш ва ўта оғир вазият юзага келганда йўловчи самолётни қўниш учун олиб бориш.

Бундан ташқари, Лукашенко Ryanair раҳбари Майкл O’Лирининг самолёт бортида Беларусь давлат хавфсизлик қўмитаси (КГБ) агентлари бўлиши мумкинлиги ҳақидаги сўзларига изоҳ берди. Лукашенконинг айтишича, Вильнюсдан қайтиб келмаслик учун Минскда уч киши тушган, аммо улардан КГБ агентлари «ясаб олишган».

Умуман олганда, самолётнинг фавқулодда қўниши ҳақидаги воқеани тавсифлар экан, Лукашенко Беларусь душманлари «тартибсизликлар уюштиришдан бўғиб ўлдириш босқичига ўтгани»ни таъкидлади.

Эслатиб ўтамиз, 23 май куни Беларусь ҳукумати Ryanair авиакомпаниясининг Афинадан Вильнюсга учаётган самолётини шошилинч равишда Минскка қўнишга мажбур қилди. Қўнишдан сўнг рейснинг икки йўловчиси — Роман Протасевич ва София Сапега ҳибсга олинди.

Беларусь расмийларининг маълум қилишича, Ryanair рейси бортида бомба борлиги ҳақида Минск аэропортига Фаластиннинг ҲАМАС ҳаракати номидан юборилган хабар келиб тушган. ҲАМАС ўзининг бу хабарга алоқаси йўқлигини айтди.

Ryanair самолётининг фавқулодда қўндирилишидан сўнг, Европа мамлакатлари Беларусдан парвозларни қабул қилишни рад эта бошлади, Европа авиакомпаниялари эса Беларусь ҳаво ҳудудини кесиб ўтишдан бош тортмоқда.