Ёқутистон Россия ҳудудлари ичида биринчи бўлиб коронавирусга қарши мажбурий эмлашни жорий қилди

Россия Федерацияси таркибига кирувчи Ёқутистон (Саха) Республикаси ҳудудлари ичида биринчи бўлиб мажбурий эмлаш жорий этгани ҳақида эълон қилди, деб ёзади Meduza.

Республика расмий ахборот портали хабарига кўра, Ёқутистон раҳбари Айсен Николаев муниципалитетлар ва шаҳар округлари раҳбарларига тегишли меъёрий ҳужжатларни ишлаб чиқишни буюрди.

Қайд этилишича, авваламбор, болалар ёзги таътилини ташкил этиш билан шуғулланадиган таълим соҳаси ходимлари ва республика миқёсидаги оммавий тадбирларни ўтказишда иштирок этадиган ходимлар коронавирусга қарши эмланишга мажбур бўлади. Эмлашдан асоссиз равишда бош тортган ходимнинг ишлашига йўл қўйилмаслиги мумкин.

Мажбурий вакцинацияни амалга оширмаган иш берувчилар 200 минг рубль (2 727 доллар) ва ундан ортиқ миқдорда жаримага тортилади. Бундай жарималар барча мулк шаклларидаги корхоналар, шу жумладан, республикада фаолият кўрсатаётган хусусий компаниялар ва федерал тузилмалар учун ҳам амал қилади.

19 май куни республика бош санитария шифокори Маргарита Игнатьева тегишли буйруқни имзолади, унга кўра, Ёқутистоннинг 60 ёшдан ошган аҳолиси, сурункали касалликларга чалинган кишилар, йирик аҳоли пунктлари аҳолиси, ҳарбий хизматчилар, ҳуқуқни муҳофаза қилиш органлари ходимлари, хизмат кўрсатиш соҳаси ва уй-жой коммунал хизматлари ходимлари, кўнгиллилар ва сменали ишчилар, давлат ва коммунал хизматчилар, ўрта ва олий ўқув юртларида ўқиётган 18 ёшдан катта шахслар коронавирусга қарши эмланиши шарт.

Буйруқда айтилишича, юқумли касалликларга чалиниш хавфи юқори бўлган шахслар эмланмаган тақдирда улар ўқишга қабул қилинмаслиги ёки иш фаолияти тўхтатиб қўйилиши мумкин.

Ушбу маълумот оммавий ахборот воситаларида кенг тарқалганидан сўнг, Ёқутистон расмийлари пресс-релиздаги сўзларни юмшатди: энди минтақа аҳолисини «мажбурий» эмлаш эмас, балки «оммавий» эмлашни таъминлаш ҳақида сўз боради. Ёқутистон бош санитария шифокори аниқлик киритишича, агар иш берувчининг тегишли буйруғи бўлса, ходимлар эмлаш марказига келиши шарт, аммо ўша ерда хабардор қилинган ҳолда эмланишдан бош тортишни расмийлаштириши мумкин бўлади.