Сурияда бугун, 26 май куни президентлик сайловлари бўлиб ўтмоқда. Сайлов участкаларида овоз бериш соат 07:00 да бошланиб, соат 19:00 гача давом этади.
Мамлакатда ва чет элларда яшовчи 18 миллиондан ортиқ суриялик фуқаролар президентлик сайловларида овоз бериш ҳуқуқига эга. Бунинг учун 12 102 та сайлов участкалари ташкил этилган.
«Сайлов Дамашқ томонидан назорат қилинадиган ҳудудларда ўтказилмоқда. Аввалги сайловлардан кейинги етти йил ичида бу ҳудуд кенгайиб кетди. Шу билан бирга, Идлибда, шунингдек, Суриянинг шимолий ва шимоли-шарқидаги минтақаларнинг бир қисмида овоз беришнинг иложи йўқ», — деди Сурия Араб Республикаси Халқ Кенгаши аъзоси Усама Мустафо.
Дамашқда овоз бериш жараёни бошланиши арафасида оммавий тантаналар, концертлар бўлиб ўтди, пойтахт кўчаларида автоуловлар миллий рамзлар билан безатилди.
Давлат раҳбари лавозими учун курашда уч нафар номзод — амалдаги президент Башар ал-Асад, социалистик иттифоқчи партиянинг собиқ депутати Абдулла Саллум Абдулла ва ватанпарвар мухолифат вакили Маҳмуд Аҳмед Мурай иштирок этмоқда.
Дамашқ террорчилар овоз бериш жараёнини бузиш учун қуролли ҳужумлар уюштириши мумкинлигини истисно этмаяпти. Шу сабабли Сурия ҳукумати сайлов участкаларининг хавфсизлигини таъминлаш учун қўшимча чоралар кўрди.
Сурияда аввалги президентлик сайловлари 2014 йилда бўлиб ўтган эди. Овоз беришда Сурия фуқароларининг 73,5 фоизи иштирок этган. Араб социалистик Уйғониш партияси раҳбари Башар ал-Асад 88,7 фоиз сайловчиларнинг қўллаб-қувватлаши билан сайловда ғалаба қозонган эди.
Сурия конституциясига кўра, давлат раҳбари яна етти йиллик муддатга қайта сайланиши мумкин.
Изоҳ (0)