Март охирида Сувайш каналига тиқилиб қолиб, канални олти кунга тўсиб қўйган Ever Given контейнер кемаси капитани ҳодисада айбдор деб топилди. Бу ҳақда канал маъмурияти раҳбари Усама Рабига таяниб, «РБК» хабар берди.
Рабининг таъкидлашича, тергов капитаннинг бошқарувда хатога йўл қўйгани, бу эса контейнер кемасини канал бўйлаб бурилиб кетишига ва саёзликка ўтириб қолишига сабаб бўлганини исботлади.
Ҳимоя тараф айбнинг бир қисми Сувайш канали маъмуриятининг лоцманларига (йўл бошловчи) тегишли бўлиши мумкинлигига ишора қилди. Бироқ Раби ушбу мутахассисларнинг ҳаракатга оид кўрсатмалари тавсия хусусиятига эга, якуний қарорни фақат капитан қабул қилади, дея даъво қилмоқда.
Раби ёмон ҳавода катта кеманинг каналдан ўтишига имкон бергани учун воқеада маъмурият айбдор, деган даъволарни қабул қилиб бўлмаслигини таъкидлади. «Юк ташиш ҳатто ёмон об-ҳаво шароитида ҳам одатдагидек давом этади, буни каналда Ever Given’дан олдин 12 та кеманинг ўтиб кетгани тасдиқлайди», — дейилади хабарда.
Шунингдек, Раби кема эгаси билан музокаралар чоғида Сувайш канали маъмурияти воқеа учун товон пули миқдорини деярли 40 фоизга — 916 миллион доллардан 550 миллион долларгача камайтиришга рози бўлганини айтди. Унинг сўзларига кўра, 200 миллион доллар гаров сифатида нақд пулда, қолган қисми эса кафолат хатлари бўйича банк тўловлари шаклида тўланиши керак.
Эслатиб ўтамиз, 23 март куни Ever Given кемаси кучли шамол ва қум бўрони туфайли йўналишини ўзгартириб, бурун ва қуйруқ қисмлари билан иккала қирғоққа тиралиб қолиб, Сувайш каналининг бир магистралли жанубий қисмини тўсиб қўйган эди. Бунинг натижасида 450 дан ортиқ кемадан иборат тирбандлик юзага келган. Шунингдек, ҳодиса ортидан нефть нархи кескин ўсган.
Сувайш канали орқали икки йўналишда ҳам кемалар ҳаракати 29 март, душанба оқшомидан қайта тикланди.
Аввалроқ Сувайш каналининг тўсилиб қолиши оқибатида етган зарар 1 миллиард долларга баҳолангани ҳақида хабар берилганди. Канал маъмурияти бўлиб ўтган ҳодисада Ever Given кемаси капитанини айбдор деб атади. Кеманинг эгаси эса ишни судга оширмаслик учун зарарни қоплаб бермоқчилигини маълум қилди.
Изоҳ (0)