Дунёда коронавирусга чалинганлар сони 167 252 896 кишини ташкил қилмоқда. Жонс Ҳопкинс университети маълумотларига қараганда, АҚШ (33,1 миллион киши), Ҳиндистон (26,7 миллион), Бразилия (16 миллион), Франция (5,9 миллион) ва Туркия (5,1 миллион) касалланганлар сони бўйича етакчилик қилмоқда. Вирус оқибатидаги ўлимлар эса 3 465 448 тага етди.
ЖССТ COVID-19’дан ҳам ҳалокатлироқ вирус пайдо бўлиши ҳақида огоҳлантирди
Жаҳон соғлиқни сақлаш ташкилоти бош директори Тедрос Гебрейесус дунё янги вирус пандемиясига дуч келиши, у коронавирусдан кўра янада кўпроқ ўлимларга олиб келишини истисно қилмади. Бу ҳақда у Жаҳон соғлиқни сақлаш ассамблеясининг 74-сессиясида айтиб ўтди.«Эволюция ҳисоб-китобларига кўра, янги вирус пайдо бўлади, у ҳозиргидан кўра янада юқумлироқ ва ҳалокатлироқ бўлади», — деди Гебрейесус.
У мамлакатлар ўртасида бирдамлик ҳамда маълумотлар, ресурслар, технологиялар билан айирбошлаш истагининг йўқлигини COVID-19 «пандемиясининг асосий драйвери» деб атади. Агар мамлакатлар шу йўлдан кетадиган бўлса, улар яна вирус билан учрашишга тайёр бўлмаган, хавфсиз ва адолатсиз бўлган дунёга келиб қолади, дея огоҳлантирди ЖССТ раҳбари. Дунёни хавфсизликда сақлаш учун умумий иштирок керак, дея хулоса қилди Гебрейесус.
Мавзуга доир: ЖССТ коронавирус пандемияси учун тўлқинлар тушунчасидан фойдаланмасликни маслаҳат берди
Эверест тоғида 100 киши коронавирус билан касалланди
Эверест тоғидаги таянч лагерида коронавирус билан оммавий касалланиш ҳолати юз берди. Камида 100 нафар альпинист ва ёрдамчи ходимлар вирусни юқтириб олди.Австрия экспедицияси раҳбари Лукас Фуртенбах айтишича, унинг гуруҳида етти нафар гид коронавирусга топширган тест мусбат чиққач, ўтган ҳафта ўз экспедиция сафарини тўхтатган. Шу билан бирга, Непал ҳукумати Эверестда COVID-19 авж олганини ҳозирча расман тан олмаяпти.
«Қутқарувчилар, суғурта компаниялари, шифокорлар, экспедиция раҳбарлари томонидан тасдиқланган бизга маълум ҳолатларнинг барчасини ҳисобга олганда… менда буларни исботлай олишимиз учун мусбат жавобли тестлар бор. Таянч лагерида бизда COVID-19 ташхиси тасдиқланган камида 100 киши бор, шунда рақамлар, тахминан, 150 ёки 200 та бўлиши мумкин», — деди Фуртенбах.
Таъкидланишича, бу мавсумда 408 нафар чет эллик альпинист Эверестга кўтарилиш учун рухсат олган, уларга бир неча юзлаб шерплар (Шарқий Непал, Жомолунгма тоғи атрофларида, шунингдек, Ҳиндистонда яшовчи халқ) ва ёрдамчи персонал кўмаклашади, улар эса таянч лагерида апрелдан буён яшаб келмоқда.
Мавзуга доир: Хитой Эверест тоғига чиқишни тақиқлаб қўйди
Ҳиндистонда «Спутник V» вакцинасини ишлаб чиқариш бошланди
Россия тўғридан-тўғри инвестициялар фонди ҳамда Ҳиндистондаги вакцина ва дорилар ишлаб чиқаришда етакчи бўлган компаниялардан бири Panacea Biotec Россиянинг коронавирусга қарши «Спутник V» вакцинасини ушбу мамлакатда ишлаб чиқаришни бошлади; дорини кенг кўламли ишлаб чиқариш ёзда йўлга қўйилади.Чиқарилган илк партия Гамалея номидаги илмий-тадқиқот марказига етказилади ва сифат жиҳатидан назорат амалга оширилади.
«Спутник V» Ҳиндистонда 2021 йил 12 апрель куни рўйхатдан ўтказилган, 14 майдан аҳолини эмлашда қўлланила бошлаган эди.
Изоҳ (0)