Hindistonda koronavirusdan vafot etgan odamlar soni bo‘yicha antirekord yangilandi

Hindistonda koronavirus tufayli qayd etilgan o‘limlar soni bo‘yicha antirekord yangilandi. Mamlakatda COVID-19 asoratlari oqibatida vafot etganlar soni 300 ming nafardan oshib ketdi, deya xabar bergan The Independent.

Ortda qolgan bir sutka vaqt davomida Hindistonda COVID-19 bilan kasallangan 4454 nafar odam hayotdan ko‘z yumdi. Mamlakat Sog‘liqni saqlash vazirligi bergan axborotga ko‘ra, o‘limlar sonining keskin oshishiga koronavirusga qarshi vaksina yetkazib berilishining kamayib ketgani sabab bo‘lgan. Shuningdek, qora zamburug‘ epidemiyasi ham Hindistondagi vaziyatni yanada og‘irlashtirmoqda. Mamlakat koronavirus oqibatida vafot etgan odamlar soni bo‘yicha dunyoda uchinchi o‘ringa ko‘tarildi.

Qayd etilishicha, so‘nggi vaqtlarda koronavirus asoratlari oqibatida odamlar halok bo‘lishi holatlarining aksariyati millionlab aholi istiqomat qiladigan Mumbay va Nyu-Dehli megapolislarida kuzatilgan. Mamlakatning qishloq hududlaridagi epidemiologik vaziyat ham chekka joylarda tibbiyot xizmatlarini ko‘rsatish achinarli ahvolda ekani sabab juda og‘ir holatda.

Avval Hindistonda qora zamburug‘ (mukormikoz) bilan kasallanganlar sonining 9 mingga yaqinlashgani xabar qilingan. Mamlakatda odamlarning zamburug‘ yuqtirib olishi COVID-19’dan keyingi aks ta’sir holatiga aylangan. Shifokorlarning so‘zlariga ko‘ra, muammo koronavirusni davolashda foydalaniladigan steroid vositalarda bo‘lishi mumkin. Kasallik koronavirusdan tuzalganiga 12-18 kun bo‘lgan bemorlarda uchramoqda.

Hindistonda COVID-19 bilan kasallanganlar soni fevral oyidan buyon oshib bormoqda. Mamlakat hukumati mazkur holatlarni kamaytirish uchun fuqarolaridan Ganga daryosiga murdalarni oqizmaslikni so‘rab murojaat qilgan. Hukumatning ushbu reaksiyasiga Bixar shtatidagi daryoda 100 ga yaqin odamlar jasadining topilgani sabab bo‘lgan. Daryo bo‘yidan topilgan murdalarning koronavirus oqibatdia vafot etgan bemorlar bo‘lishi mumkinligi taxmin qilingandi.

Shuningdek, Hindiston hukumati barcha ijtimoiy tarmoqlarga koronavirusning “hindcha” shtammi bilan bog‘liq yoki uning mavjudligini nazarda tutuvchi barcha kontentlarni o‘chirib tashlash iltimosi bilan murojaat yo‘llagan.