Фаластин Исроил томонидан ўт очишнинг тўхтатилишини маъқуллайди, аммо бу етарли эмас.  Бу ҳақда Фаластин ташқи ишлар вазири Риёд ал-Маликий БМТ Бош ассамблеясининг Исроил ва Фаластин масалалари бўйича мажлисида айтиб ўтди.

Фото: AP Photo

«2 миллиондан ортиқ аҳолиси бор Фаластин халқи эртанги куни янада порлоқ бўлишини билиб, уйқуга кетиши яхши. Аммо бу кам, умуман етарли эмас», — деди вазир.

Унинг таъкидлашича, можаро Қуддусдаги мусулмонларнинг аҳволи ҳамда шаҳарнинг баъзи жойларидан фаластинлик оилаларни ҳайдаб чиқариши билан қўзғатилган. Ташқи ишлар вазири ушбу муаммоларни ҳал қилиш кераклигини таъкидлади.

Вазирнинг айтишича, Исроил шаҳарда бирорта ҳам арабни қолдирмаслик учун Шарқий Қуддусдан фаластинлик оилаларни мажбуран чиқариб юборишга уринмоқда.

Фаластин вакили халқаро ҳамжамиятни можарони бир чекка шунчаки «томоша қилиб ўтирмасликка» чақирди. Унинг фикрига кўра, дунёдаги  ҳар бир давлат Исроилни Фаластин халқига қарши қилган хатти-ҳаракатлари учун жавобгарликка тортилиши учун маъсул.

Аввалроқ Исроил хавфсизлик кабинетининг аъзолари Ғазо сектори билан сулҳ тузиш учун овоз берган эди. ҲАМАС вакили Reuters агентлигига Ғазода «ўзаро ва бир вақтда» сулҳ 21 май, жума куни кечаси Тошкент вақти билан соат 04:00да бошланишини тасдиқлаган.

Фаластин—Исроил низосининг 2014 йилдан буён кузатилган энг кучли авж олиши май ойида Исроил ҳукуматининг Қуддусда бир қатор араб оилаларини кўчириб юбориш қароридан кейин бошланди. Бу норозиликларни келтириб чиқарди ҳамда Қуддусда араб намойишчилар ва Исроил полицияси ўртасидаги тўқнашувларга сабаб бўлди.

Вазиятга ҲАМАС аралашди. Исроил унинг полицияни олиб кетиш ҳақидаги талабларини бажармаганидан кейин гуруҳ ракеталар отишни бошлади. Бунга жавобан Исроил Ғазо секторини ўққа тутди.