Ҳиндистоннинг Ражастан ва Телангана штатлари расмийлари қора замбуруғ деб номланувчи хавфли касаллик — мукормикоз эпидемиясини эълон қилди. Бу ҳақда «РБК» хабар берди.
Маълумки, ушбу касаллик биринчи навбатда коронавирус юқтирганларга ўз таъсирини ўтказади.
Ражастан соғлиқни сақлаш вазири Ахил Ароранинг айтишича, мукормикозни эпидемия деб эълон қилиш, уни COVID-19 билан биргаликда «комплекс ва мувофиқлаштирилган» ҳолда даволашга имкон беради.
Штат маъмуриятининг маълумотларига кўра, минтақада мукормикоз билан касалланган 100 га яқин бемор бор, улар учун Савай Ман Сингх давлат касалхонасида махсус бўлим ажратилган.
Ражастандан кейин Телангана штати маъмурлари мукормикоз эпидемиясини эълон қилди.
«Соғлиқни сақлаш бўйича барча давлат ва хусусий муассасалар мукормикозни скрининг, диагностика ва даволаш бўйича Соғлиқни сақлаш ва оилавий фаровонлик вазирлиги, Ҳиндистон ҳукумати ва Ҳиндистон тиббий тадқиқотлар кенгаши томонидан чиқарилган кўрсатмаларга амал қилиши шарт», — дейилади India Today берган хабарда.
Барча тиббиёт муассасалари касаллик тўғрисида Соғлиқни сақлаш вазирлигига хабар бериши кераклиги қўшимча қилинган.
Ҳиндистонда COVID-пандемия фонида одамларнинг хавфли замбуруғларга чалиниш ҳолатлари кўпайди. Россиялик вирусологлар мукормикоз касаллиги глобал хавф келтириб чиқармаслигини айтди. Шу билан бирга қора замбуруғ инфекцияси Россияда ҳам қайд этилди.
Маълумот учун мукормикоз табиатда кенг тарқалган микроскопик замбуруғлар (мукормицетлар) келтириб чиқарадиган ноёб инфекция. Улар тупроқда яшайди, кўпинча чириган ўсимликлар ва сабзавотлар юзасида ажралиб туради.
Ушбу инфекция бурун, кўз ва нафас олиш тизимига таъсир қилади. Касаллик бурун бўшлиғи ва бурун ёндош бўшлиқларида ривожланиб, кўз косаларига тарқалади. Инфекция тушган аъзоларда, айниқса, бурунда тўқима некрози туфайли ўзига хос қора қўтир пайдо бўлади.
Изоҳ (0)