Жонс Ҳопкинс университети маълумотларига кўра, дунёда COVID-19 билан касалланганлар сони 164 284 766 кишига етди. Вирусни юқтириб олиш ҳолатлари бўйича АҚШ (32,9 миллион киши), Ҳиндистон (25,4 миллион), Бразилия (15,7 миллион), Франция (5,9 миллион) ва Туркия (5,1 миллион) олдинда бормоқда. Коронавирус оқибатидаги ўлимлар сони эса дунё бўйича 3 406 261 тани ташкил қилмоқда.
Саудия Арабистонида коронавирусга қарши эмланиш талаби жорий қилинади
Саудия Арабистони 1 августдан ҳар қандай ҳукумат, хусусий ва таълим муассасаларига ташриф буюриш учун эмланиш талабини жорий қилади. Бу ҳақда мамлакат Ташқи ишлар вазирлиги вакили маълум қилди. COVID-19’га қарши эмланмасдан туриб тадбирларга бориш ҳам мумкин бўлмайди.Талаб иқтисодий, тижорий, маданий, илмий ва ижтимоий хусусиятга эга тадбирлар, шунингдек, спорт ва кўнгилочар тадбирлар учун ҳам амал қилади. Жамоат транспортидан фойдаланиш учун ҳам COVID-19’га қарши вакцина олган бўлиш керак.
Саудия Арабистонида 435 027 кишида коронавирус аниқланган, шуларнинг 7188 нафари вафот этган.
Мавзуга доир: Саудия Арабистони «махсус шартлар» асосида Ҳаж сафарларини амалга оширишга рухсат беради
Чехияда ёзда ПЗР-тестлар бепул бўлади
Чехия ҳукумати ёзги таътиллар даврида COVID-19’га нисбатан ПЗР-тестларни аҳоли учун бепул қилиб қўймоқчи, дея маълум қилди бош вазир Андрей Бабиш.«Июндан сентябргача бўлган даврда бепул ПЗР-тест топшириш имкониятини жорий қилишни кўриб чиқяпмиз. Коронавирус туфайли одамлар катта харажат қилишини хоҳламаймиз», — деди Бабиш.
Айни пайтда чет элга чиқмоқчи бўлган ҳар бир фуқаро икки марта — Чехиядан чиқиб кетишдан аввал ва қайтиб келганидан сўнг — тест топшириши керак.
Ҳар битта тест нархи тахминан 1500 кронага тенг (65 доллар). Шу тариқа, тўрт кишилик ўртача оила 8 та тест топшириши керак бўлади, бунга 12 минг крона (520 доллар) сарфлашга тўғри келади.
Мавзуга доир: Чехияда коронавируснинг янги штамми аниқланди
Ҳиндистонда COVID-ўлимлар бўйича кетма-кет иккинчи кун рекорд янгиланди
Сўнгги бир кеча-кундузда Ҳиндистонда 267 мингдан ортиқ одам коронавирусга чалинди. Вирус оқибатида бир кунда 4529 киши вафот этди, бу янги рекорд кўрсаткич бўлди. Бундан аввалги энг юқори кўрсаткич 18 майда қайд этилганди — 4329 та.Мамлакатда жами касалланганлар сони 25,2 миллиондан, вафот этганлар — 283 мингдан ошди. Ҳиндистонда сўнгги 24 соат ичида 1,3 миллион киши COVID-19’га қарши эмланди, жами эмланганлар сони 185,8 миллионга етди.
Мавзуга доир: Ҳиндистонда коронавирусга чалинган талаба 11 кун дарахтда яшаб, ўзини ўзи изоляциялади
Австрияда коронавирус туфайли чекловлар юмшатилди
Австрия аста-секинлик билан карантиндан чиқмоқда. «Ваъда қилинганидек, 19 май куни бутун Австрияда гастрономия, туризм, маданият ва спорт муассасалари, ва ниҳоят, очилиши мумкин бўлди», — деди мамлакат канцлери Себастьян Курс.Жамоат жойларига коронавирусга нисбатан тест топширилганидан кейин ташриф буюриш мумкин. Ҳамма тестларнинг амал қилиш муддати турлича бўлиб, масалан, уйда қилинган тестлар бор-йўғи 24 соат, шифокорлар томонидан олинганлари — 48 соат, ПЗР-тестлар эса уч кун амал қилади.
Меҳмонхона ва ресторанларга фақат ниқоб билан кириш мумкин. Ресторан ичида битта стол атрофида кўпи билан тўрт киши, ташқарида эса — ўн киши ўтириши мумкин, бунда болалар ҳисобга олинмайди.
Изоҳ (0)