Россия Ички ишлар вазирлиги чет эллик талабаларнинг Россияда бўлиб туришини соддалаштирадиган қонун лойиҳасини ишлаб чиқди. Бу ҳақда ҳужжатга асосланиб «Коммерсантъ» хабар берди.
Қайд этилишича, ушбу ташаббус Россия университетлари ва илмий ташкилотларида тўлиқ шаклда ўқиётган чет эл фуқаролари ва фуқаролиги бўлмаган шахслар учун «махсус ҳуқуқий режимни ўрнатишга» қаратилган.
Ҳозирги кунда чет эллик талабалар вақтинча яшаш учун рухсатномани ҳукумат томонидан белгиланган квота доирасида умумий асосда олади. Бундай рухсатноманинг амал қилиш муддати уч йил. Таъкидланишича, янги қонун лойиҳасида чет эллик талабанинг илтимосига қараб, ўқиш даври ва кейинги 180 кун учун рухсатнома чиқарилиши таклиф этилади. Шу билан бирга, чет эллик талабалар рус тилини, Россия тарихи ва қонунчилик асосларини билиш фактини тасдиқлаш мажбуриятидан озод қилинади ва ҳар йили яшаш жойи тўғрисида билдиришнома юбориши талаб этилмайди.
Бундан ташқари, қонун лойиҳасида чет эллик талабаларнинг ўқишни битирганидан сўнг уч йил ичида Россияда истиқомат қилиш учун гувоҳнома олишини соддалаштириш назарда тутилгани айтилмоқда.
Вазирлик қайд этишича, таклиф қилинаётган ўзгартиришлар Россия Ички ишлар вазирлигининг ҳудудий органлари ва давлат таълим муассасалари ёки илмий муассасалари зиммасидаги юкни енгиллаштиради, шунингдек, чет эллик талабаларни Россия жамиятига қўшилишига ҳамда касбий ва илмий салоҳият эгаларини мамлакатда олиб қолишга ёрдам беради.
Хабарга кўра, Россия Юристлар ассоциацияси кенгаши раиси Владимир Груздев қонун лойиҳасини ижобий баҳолаган ва бу ҳақиқатан ҳам чет эллик талабаларнинг Россияда бўлиб туришини осонлаштиришини таъкидлаган. «Чет эл фуқаролари яшаш жойларида миграция учун рўйхатдан ўтади. Талабалар университетлардан четлатилган тақдирда, яшаш учун берилган рухсатнома ўттиз кун ичида тугатилади», — деди Груздев.
2020 йилнинг августида Россия университетлари ва касб-ҳунар коллежларида таҳсил олаётган чет элликларга рухсатнома ёки патент олиш заруриятисиз соддалаштирилган тартибда ишга жойлашиш имконини берадиган қонун кучга кирган эди. Давлат Думаси раиси Вячеслав Володин ушбу чора Россия таълим муассасаларида таҳсил олаётган чет эл фуқаролари сонини камида икки баравар оширишини айтган.
Мавзуга доир:
- Путин: Россия ҳукумати мамлакатни муҳожирлар учун қулай қилишга интилмоқда
- Россия ОТМлари пандемия туфайли хорижлик талабаларни ўқишдан четлаштирмайди
- Россия ОТМларига кириш имтиҳонларини онлайн топшириш учун рухсат берилди
- Россия Ички ишлар вазирлиги ноқонуний муҳожирларни мамлакатда бўлиш муддатини узайтириш учун мурожаат қилишга чақирди
Изоҳ (0)