Беларусда Tut.by мухолифат нашрининг 12 нафар ходими ҳибсга олинди. Бу ҳақда нашр ўз Telegram каналида маълум қилди, деб ёзади «Korrespondent.net».
Шунингдек, нашр компания офисида тинтув ўтказилгани ҳақида хабар қилган. Нашрнинг бош муҳаррири Марина Золотованинг уйида ҳам тинтув ўтказилган ва шундан сўнг у сўроқ қилиш учун Молиявий текширув бўлими (МТБ)га олиб кетилган.
Бош муҳаррирнинг турмуш ўртоғига таяниб берилган хабарга кўра, «тергов ҳаракатлари вақтинча олиб борилмаслиги» айтилиб, Золотовага адвокат билан учрашишга рухсат берилмаган ва уни Окрестин кўчасидаги вақтинчалик сақлаш ҳибсхонасига ўтказиш режалаштирилмоқда.
Ҳибсга олинганлар орасида нашр бош директори, бош ҳисобчи ва унинг ўринбосари, директор ўринбосари, кадрлар бўйича директор, икки бош муҳаррир ўринбосари, бир журналист, бир дастурчи муҳандис, бизнес таҳлилчи, маркетинг бўлими бошлиғи ва бир менежер бор.
Нашр, шунингдек, бош муҳаррир ўринбосарларидан бири Максим Гайко ва дастурчи-муҳандис Виталий Калиновскийнинг сўроқдан сўнг махфий маълумотларни ошкор қилмаслик тўғрисидаги келишув асосида қўйиб юборилгани ҳақида хабар қилди. Эндиликда улар ишда гувоҳ сифатида иштирок этмоқда
Шунингдек, таҳририят Tut.by офисидаги воқеаларни ёритиш учун эрталаб келган яна уч нафар журналистнинг ғойиб бўлгани, улар билан боғланиб бўлмаётгани ҳақида хабар берди. Полиция эса нашрга Минск ички ишлар бўлимига бирор кимнинг бедарак йўқолгани тўғрисида хабар келиб тушмаганини айтди. МТБ ва Тергов қўмитасида ҳам бу ҳақда маълумот йўқлиги айтилмоқда.
18 май куни Беларусь ҳукумати Tut.by янгиликлар порталини блоклаб қўйган ва буни «тақиқланган маълумотларни жойлаштириш нуқтаи назаридан ОАВ тўғрисидаги қонун бузилишининг кўплаб фактлари» билан изоҳлаган. Шундан сўнг МТБ ходимлари таҳририят офисига келган ва катта миқдордаги солиқни тўлашдан бўйин товлаш бўйича жиноят иши қўзғатилган.
МТБ нашрнинг 2019 йилда High-Tech Park (HTP) резиденти бўлганини, аммо «HTP резидентлари учун рухсат берилган фаолиятга номувофиқ» даромад олганини даъво қилмоқда. Расмийларнинг фикрича, нашр ҳукумат ёрдамидан фойдаланган ҳолда давлатга жуда катта миқдордаги зарар етказган.
Similarweb маълумотларига кўра, TUT.BY Беларуснинг энг йирик янгиликлар портали бўлиб, у 2000 йилдан бери фаолият юритиб келмоқда. Нашр журналистлари республикада 2020 йил ёз охирида, кузда ва қишда бўлиб ўтган президентлик сайловларидан кейинги норозилик намойишларини фаол равишда ёритиб борган.
Изоҳ (0)