Исроил—Фаластин низосининг кескинлашуви оқибатида инфратузилма вайрон бўлиши туфайли, Ғазода 325 минг киши шошилинч равишда сув таъминоти ва канализацияга эҳтиёж сезмоқда. Бу ҳақда БМТ Болалар фонди (ЮНИСЕФ) ижрочи директори Генриетта Фор маълум қилди, деб ёзади «Коммерсантъ». У энг зарур буюмларни хавфсиз етказиб бериш мумкин бўлиши учун минтақада гуманитар йўлаклар яратишга чақирди.
«Бизнинг ҳисоб-китобларимиз бўйича, 325 минг киши сув таъминоти ва канализацияга шошилинч тарзда эҳтиёж сезмоқда, уларсиз ўлимга олиб келадиган даражада хавфли юқумли касалликларга дуч келиш хавфи ошади», — деди Фор.
Унинг қайд этишича, фонд энг зарур маҳсулотларни, шу жумладан, ёнилғи, дори-дармонлар, биринчи ёрдам аптечкалари ва COVID-19’га қарши вакциналарни бепул етказиб бериш учун гуманитар йўлаклар яратишга чақиради.
ЮНИСЕФ минтақада гуманитар ярашувга, шунингдек, низони узоқ муддатли сиёсий ҳал қилишга даъват этади. «Низо давом этган ҳар бир кун Фаластин ва Исроилдаги болаларни азобга солади… Улар анчадан буён давом этиб келаётган зўравонлик ва қўрқувдан иборат даҳшатли воқеалардан кўра яхшироқ нарсаларга муносибдир», — деди Фор.
ЮНИСЕФ ҳисоб-китобларига кўра, Ғазода камида 60 нафар бола низо кескинлашуви оқибатида ҳалок бўлган, 444 нафари жабрланган, қарийб 30 минг бола эса яшаш жойини тарк этишга мажбур бўлган.
Изоҳ (0)