АҚШ ракета таҳдидларини кузатиш учун орбитага сунъий йўлдош олиб чиқди (видео)

Американинг United Launch Alliance (ULA) компанияси бортида ракета ҳужумларидан огоҳлантирувчи SBIRS GEO 5 сунъий йўлдоши бўлган Atlas 5 ракетасини учирди, деб ёзади «Интерфакс».

Boeing ва Lockheed Martin қўшма корхонаси бўлган ULA ўз ракетасини 18 май куни соат 13:37 да (Тошкент вақти билан 22:37) Флорида штатининг Канаверал бурнидаги авиабазадан учирди.

SBIRS GEO 5 АҚШнинг эскириб қолган олдиндан огоҳлантириш тизимларини алмаштириш учун коинотга йўналтирилган тўққизинчи инфрақизил кузатув тизимидир. Янги тизим баллистик ракеталар учирилишини назорат қилиш билан бир қаторда, уларни тутиб олиш учун парвоз траекториясини аниқлаш, жанговар каллаклар ва сохта нишонларни идентификация қилиш учун мўлжалланган.

Эндиликда бешта SBIRS GEO геостационар ҳамда тўртта SBIRS GEO юқори эшелонли сунъий йўлдошдан иборат бўлган орбитал туркум ракеталар учирилишини тун-у кун кузатиб туради. Шунингдек, Пентагон олтинчи SBIRS GEO сунъий йўлдошини учиришни режалаштирмоқда.

SBIRS GEO-5 ва SBIRS GEO-6 олдиндан огоҳлантирувчи сунъий йўлдошлар бутун дунёда учириладиган баллистик ракеталар устидан назоратни яхшилайди. Lockheed Martin ва Northrop Grumman корпорациялари томонидан яратилган ҳар бир 4,5 тонна оғирликдаги бундай космик кеманинг баҳоси қарийб 2 миллиард долларни ташкил этади.

2020 йил декабрь ойи охирида АҚШ Конгресси ракеталарга қарши мудофаа агентлигига гипертовушли ракеталарни ҳам кузатишга қодир бўлган янги сунъий йўлдош туркумини яратиш учун 130 миллион доллар ажратган.

Ернинг қуйи орбитасидаги сунъий йўлдошлар одатдаги баллистик ракеталарга нисбатан деярли кўринмайдиган ва манёвр қилиши мумкин гипертовушли ракеталарни аниқлаш ва тегишли маълумотларни тақдим этиши керак. АҚШ ҳарбийларининг фикрига кўра, бундай орбитал туркум АҚШнинг ракетага қарши мудофаа тизимидаги мавжуд бўшлиқни тўлдиради.

Маълумотларга кўра, 20 та шундай сенсорли сунъий йўлдошнинг биринчи партияси 2021 йилда орбитага чиқарилиши мумкин. Шунингдек, бир йил ичида орбитага яна 150 та космик аппаратни жойлаштириш режалаштирилган.

Ҳозирда АҚШ Мудофаа вазирлигининг ракеталарга қарши мудофаа агентлиги ва космик ривожланиш агентлиги томонидан Hypersonic and Ballistic Tracking Space Sensor (HBTSS)  номли гипертовушли ва баллистик космик кузатув сенсори бўлган сунъий йўлдошни яратиш бўйича ишлар олиб борилмоқда. Январь ойида L3Harris (122 миллион доллар) ва Northrop Grumman (155 миллион доллар) билан бундай сунъий йўлдошларни ишлаб чиқариш бўйича шартномалар тузилган.