Jons Hopkins universiteti ma’lumotlariga ko‘ra, dunyoda COVID-19 bilan kasallanganlar soni 164 284 766 kishiga yetdi. Virusni yuqtirib olish holatlari bo‘yicha AQSh (32,9 million kishi), Hindiston (25,4 million), Braziliya (15,7 million), Fransiya (5,9 million) va Turkiya (5,1 million) oldinda bormoqda. Koronavirus oqibatidagi o‘limlar soni esa dunyo bo‘yicha 3 406 261 tani tashkil qilmoqda.
Saudiya Arabistonida koronavirusga qarshi emlanish talabi joriy qilinadi
Saudiya Arabistoni 1-avgustdan har qanday hukumat, xususiy va ta’lim muassasalariga tashrif buyurish uchun emlanish talabini joriy qiladi. Bu haqda mamlakat Tashqi ishlar vazirligi vakili ma’lum qildi. COVID-19’ga qarshi emlanmasdan turib tadbirlarga borish ham mumkin bo‘lmaydi.Talab iqtisodiy, tijoriy, madaniy, ilmiy va ijtimoiy xususiyatga ega tadbirlar, shuningdek, sport va ko‘ngilochar tadbirlar uchun ham amal qiladi. Jamoat transportidan foydalanish uchun ham COVID-19’ga qarshi vaksina olgan bo‘lish kerak.
Saudiya Arabistonida 435 027 kishida koronavirus aniqlangan, shularning 7188 nafari vafot etgan.
Mavzuga doir: Saudiya Arabistoni “maxsus shartlar” asosida Haj safarlarini amalga oshirishga ruxsat beradi
Chexiyada yozda PZR-testlar bepul bo‘ladi
Chexiya hukumati yozgi ta’tillar davrida COVID-19’ga nisbatan PZR-testlarni aholi uchun bepul qilib qo‘ymoqchi, deya ma’lum qildi bosh vazir Andrey Babish.“Iyundan sentabrgacha bo‘lgan davrda bepul PZR-test topshirish imkoniyatini joriy qilishni ko‘rib chiqyapmiz. Koronavirus tufayli odamlar katta xarajat qilishini xohlamaymiz”, — dedi Babish.
Ayni paytda chet elga chiqmoqchi bo‘lgan har bir fuqaro ikki marta — Chexiyadan chiqib ketishdan avval va qaytib kelganidan so‘ng — test topshirishi kerak.
Har bitta test narxi taxminan 1500 kronaga teng (65 dollar). Shu tariqa, to‘rt kishilik o‘rtacha oila 8 ta test topshirishi kerak bo‘ladi, bunga 12 ming krona (520 dollar) sarflashga to‘g‘ri keladi.
Mavzuga doir: Chexiyada koronavirusning yangi shtammi aniqlandi
Hindistonda COVID-o‘limlar bo‘yicha ketma-ket ikkinchi kun rekord yangilandi
So‘nggi bir kecha-kunduzda Hindistonda 267 mingdan ortiq odam koronavirusga chalindi. Virus oqibatida bir kunda 4529 kishi vafot etdi, bu yangi rekord ko‘rsatkich bo‘ldi. Bundan avvalgi eng yuqori ko‘rsatkich 18-mayda qayd etilgandi — 4329 ta.Mamlakatda jami kasallanganlar soni 25,2 milliondan, vafot etganlar — 283 mingdan oshdi. Hindistonda so‘nggi 24 soat ichida 1,3 million kishi COVID-19’ga qarshi emlandi, jami emlanganlar soni 185,8 millionga yetdi.
Mavzuga doir: Hindistonda koronavirusga chalingan talaba 11 kun daraxtda yashab, o‘zini o‘zi izolyatsiyaladi
Avstriyada koronavirus tufayli cheklovlar yumshatildi
Avstriya asta-sekinlik bilan karantindan chiqmoqda. “Va’da qilinganidek, 19-may kuni butun Avstriyada gastronomiya, turizm, madaniyat va sport muassasalari, va nihoyat, ochilishi mumkin bo‘ldi”, — dedi mamlakat kansleri Sebastyan Kurs.Jamoat joylariga koronavirusga nisbatan test topshirilganidan keyin tashrif buyurish mumkin. Hamma testlarning amal qilish muddati turlicha bo‘lib, masalan, uyda qilingan testlar bor-yo‘g‘i 24 soat, shifokorlar tomonidan olinganlari — 48 soat, PZR-testlar esa uch kun amal qiladi.
Mehmonxona va restoranlarga faqat niqob bilan kirish mumkin. Restoran ichida bitta stol atrofida ko‘pi bilan to‘rt kishi, tashqarida esa — o‘n kishi o‘tirishi mumkin, bunda bolalar hisobga olinmaydi.
Izoh (0)