АҚШ президенти Жо Байден ва унинг рафиқаси 2020 йилда 600 минг доллар даромад олди. Вице-президент Камала Харрис ва турмуш ўртоғи — бундан уч баравар кўп

АҚШ президенти Жо Байден, шунингдек, маъмуриятнинг бошқа ходимлари 2020 йил учун солиқ декларациясини эълон қилди, деб ёзмоқда Оқ уйнинг матбуот хизмати.

Маълумотларга кўра, 2020 йилда Байден ва унинг рафиқаси Жилл 607 минг доллардан бироз кўпроқ даромад олган. Бу даврда АҚШ вице-президенти Камала Харриснинг турмуш ўртоғи, ҳуқуқшунос Дуглас Эмхофф билан топган даромади деярли 1,7 миллион долларни ташкил қилган.

Давлат раҳбари ва биринчи хоним ўз даромадининг 25,9 фоизини (157 минг доллар) солиқларга тўлаган. Бундан ташқари, 2020 йилда Байденлар оиласи 10 та турли хилдаги хайрия ташкилотига 30,7 минг доллар миқдорида хайрия қилган.

Камала Харрис эса турмуш ўртоғи билан топган даромадининг 36,7 фоизини (622 минг доллар) солиқларга тўлаган, шу билан бирга, 27 минг доллар хайрияга ажратган.

Дональд Трамп ўз президентлиги даврида бир неча марта турли баҳоналар билан ўз даромадлари тўғрисидаги маълумотларни эълон қилишдан бош тортган эди. 2020 йилнинг август ойида ҳукумат қошидаги Ахлоқ ишлари идораси Трампнинг 2019 йилги даромадларининг 78 бетдан иборат молиявий декларациясини тақдим этган эди.

Америка ОАВларининг ҳисоб-китобларига кўра, тегишли даврда Дональд Трамп энг камида 446 миллион доллар ишлаб топган. Флорида штатидаги Маr-а-Lago (Трампнинг қароргоҳи), Trump National Doral Miami курорти ва Вашингтондаги Trump Intrnational Hotel меҳмонхонаси собиқ президентнинг асосий даромад манбалари бўлган.

Мутахассисларнинг ҳисоб-китобларига кўра, Трампнинг 2018 йилги даромадлари тўғрисидаги декларацияда унинг, тахминан, 421 миллион доллар даромад олгани қайд этилган. Ўшанда собиқ президентнинг активлар рўйхатида 500 дан ортиқ мулк, шу жумладан, кўчмас мулк, қимматли қоғозлар, компаниялар кўрсатилган эди.

Аввалроқ Жо Байден собиқ президент Дональд Трамп томонидан 2020—2021 йилларда имзоланган еттита фармонни бекор қилди.

Маълумот учун, президентликнинг биринчи куниёқ Байден Трамп томонидан қабул қилинган бир нечта фармонларни бекор қила бошлаган эди. Хусусан, Байден Трампнинг иқлим бўйича Париж битими ва ЖССТдан чиқиш тўғрисидаги қарорларини ҳамда мамлакатга айрим тоифадаги чет элликларнинг киришини тақиқловчи ҳужжатни бекор қилган.