АҚШ президентининг Миллий хавфсизлик бўйича ёрдамчиси Жейк Салливан Арманистон ва Озарбайжонни чегараларни белгилаб олиш бўйича музокаралар ўтказишга чақирди. Бу ҳақда Оқ уй матбуот хизматига таяниб, «РБК» хабар берди.
Оқ уйнинг аниқлик киритишича, тегишли баёнот Салливаннинг Арманистон бош вазири вазифасини бажарувчи Никол Пашинян ва Озарбайжон президенти Илҳом Алиев билан алоҳида суҳбатларида берилган.
Қайд этилишича, суҳбатлар чоғида АҚШ президентининг ёрдамчиси сўнгги пайтларда икки мамлакат чегарасидаги зиддиятлардан хавотир билдирди. У минтақадаги қўшинлар ҳаракати масъулиятсиз ва провокацион эканлигини таъкидлади. Шу билан бирга, у Вашингтон зиддиятли томонларни муросага келтиришга интилаётганини таъкидлади.
12 май куни Арманистон Мудофаа вазирлиги Озарбайжон ҳарбийлари «чегараларни аниқлаштириш» баҳонасида чегара ҳудудларидан бирида айрим ҳаракатларни амалга ошираётгани ҳақида хабар берди. Пашинян ҳодисани мамлакат суверенитетига тажовуз деб атади. Унинг сўзларига кўра, Озарбайжон ҳарбийлари Севлич кўли (Арманистоннинг Сюник вилояти ва Озарбайжоннинг Лочин вилояти ўртасида жойлашган) ҳудудидан кесиб ўтиб, 3,5 км ичкарига кирган.
Ўз навбатида, Боку Арманистоннинг реакциясини асоссиз деб атади. Уларнинг фикрига кўра, Арманистон билан чегарадаги Озарбайжоннинг Келбажар ва Лочин вилоятларига чегара кучларини жойлаштириш 2020 йил 10 ноябрдаги уч томонлама келишувга мувофиқ олиб борилмоқда.
Озарбайжон Арманистон билан чегарадаги кескинлик фонида ҳарбий машғулотлар ўтказишни ҳам бошлади.
Изоҳ (0)