AQSh prezidenti Jo Bayden, shuningdek, ma’muriyatning boshqa xodimlari 2020-yil uchun soliq deklaratsiyasini e’lon qildi, deb yozmoqda Oq uyning matbuot xizmati.
Ma’lumotlarga ko‘ra, 2020-yilda Bayden va uning rafiqasi Jill 607 ming dollardan biroz ko‘proq daromad olgan. Bu davrda AQSh vitse-prezidenti Kamala Xarrisning turmush o‘rtog‘i, huquqshunos Duglas Emxoff bilan topgan daromadi deyarli 1,7 million dollarni tashkil qilgan.
Davlat rahbari va birinchi xonim o‘z daromadining 25,9 foizini (157 ming dollar) soliqlarga to‘lagan. Bundan tashqari, 2020-yilda Baydenlar oilasi 10 ta turli xildagi xayriya tashkilotiga 30,7 ming dollar miqdorida xayriya qilgan.
Kamala Xarris esa turmush o‘rtog‘i bilan topgan daromadining 36,7 foizini (622 ming dollar) soliqlarga to‘lagan, shu bilan birga, 27 ming dollar xayriyaga ajratgan.
Donald Tramp o‘z prezidentligi davrida bir necha marta turli bahonalar bilan o‘z daromadlari to‘g‘risidagi ma’lumotlarni e’lon qilishdan bosh tortgan edi. 2020-yilning avgust oyida hukumat qoshidagi Axloq ishlari idorasi Trampning 2019-yilgi daromadlarining 78 betdan iborat moliyaviy deklaratsiyasini taqdim etgan edi.
Amerika OAVlarining hisob-kitoblariga ko‘ra, tegishli davrda Donald Tramp eng kamida 446 million dollar ishlab topgan. Florida shtatidagi Mar-a-Lago (Trampning qarorgohi), Trump National Doral Miami kurorti va Vashingtondagi Trump Intrnational Hotel mehmonxonasi sobiq prezidentning asosiy daromad manbalari bo‘lgan.
Mutaxassislarning hisob-kitoblariga ko‘ra, Trampning 2018-yilgi daromadlari to‘g‘risidagi deklaratsiyada uning, taxminan, 421 million dollar daromad olgani qayd etilgan. O‘shanda sobiq prezidentning aktivlar ro‘yxatida 500 dan ortiq mulk, shu jumladan, ko‘chmas mulk, qimmatli qog‘ozlar, kompaniyalar ko‘rsatilgan edi.
Avvalroq Jo Bayden sobiq prezident Donald Tramp tomonidan 2020—2021-yillarda imzolangan yettita farmonni bekor qildi.
Ma’lumot uchun, prezidentlikning birinchi kuniyoq Bayden Tramp tomonidan qabul qilingan bir nechta farmonlarni bekor qila boshlagan edi. Xususan, Bayden Trampning iqlim bo‘yicha Parij bitimi va JSSTdan chiqish to‘g‘risidagi qarorlarini hamda mamlakatga ayrim toifadagi chet elliklarning kirishini taqiqlovchi hujjatni bekor qilgan.
Mavzuga doir:
- AQSh Isroilga 735 mln dollarlik qurol-yarog‘ yetkazib berishi ma’lum bo‘ldi. Erdo‘g‘on buning uchun Baydenni tanqid qildi
- AQSh Adliya vazirligi Trampning muhojirlarga nisbatan “nol bardoshlilik” siyosatini bekor qildi
- Bayden Tramp davrida qabul qilingan qoidalarni bekor qiluvchi migratsiyaga oid bir nechta farmonlarni imzolaydi
Izoh (0)