Ҳиндистонда тарқалган қора замбуруғ инфекцияси Россияда ҳам қайд этилди

Россияда COVID-19 билан касалланган беморларда қора замбуруғ (мукормикоз)га чалиниш ҳоллари қайд этилди, деб ёзади «Известия». Мукормикоз коронавирус билан боғлиқ вазиятнинг кучайиши фонида Ҳиндистонда кенг тарқалган.

Мукормикоз табиатда кенг тарқалган микроскопик замбуруғлар (мукормицетлар) келтириб чиқарадиган ноёб инфекция. Улар тупроқда яшайди, кўпинча чириган ўсимликлар ва сабзавотлар юзасида ажралиб туради.

Ушбу инфекция бурун, кўз ва нафас олиш тизимига таъсир қилади. Касаллик бурун бўшлиғи ва бурун ёндош бўшлиқларида ривожланиб, кўз косаларига тарқалади. Инфекция тушган аъзоларда, айниқса, бурунда тўқима некрози туфайли ўзига хос қора қўтир пайдо бўлади.

Даво чоралари кўрилмаган тақдирда, мукормикоз тўсатдан ўлимга олиб келиши мумкин, шу билан бирга, терапия ёрдамида беморларнинг фақат 50 фоизини сақлаб қолиш мумкин.

«Ҳозир Россияда Ҳиндистондаги вазият билан таққосланадиган бирор нима йўқ. Менга маълум бўлишича, COVID-19 билан касалланганларда мукормикознинг учраши ҳолатлари бир-икки марта кузатилган. Айни пайтда бундай беморлардан бири бизнинг микологик клиникамизда даволанмоқда, умид қиламанки, у тузалиб кетади», — деди Россия шимоли-ғарбий давлат тиббиёт университетининг клиник микология, аллергология ва иммунология кафедраси мудири Николай Климко.

Шифокор ушбу муаммони фақат Ҳиндистонга хос деб ҳисоблаш нотўғрилигини таъкидлади, чунки касаллик барча мамлакатларда учрайди ва Россия ҳам бундан мустасно эмас.

«Аммо баъзи бир беморларнинг касалланиш эҳтимолини истисно қилиб бўлмайди. Аввало мукормикоз иммунитети сусайган одамлар учун хавфлидир. COVID-19 билан оғриган беморларда инфекция одатда декомпенсацияланган қандли диабет фонида ривожланади. Ҳиндистонда ушбу касалликка чалинган беморларнинг кўплиги сабабли мукормикоз юқтириш даражаси юқори», — деди Климко.

Москва физика-техника институти геномик муҳандислик лабораториясининг бошлиғи Павел Волчков ҳарорат ва намлик даражаси юқори бўлган минтақалар мазкур инфекциянинг кенг тарқалиши учун қулай муҳит эканини айтди.

«Ушбу касаллик Ҳиндистон каби тропик зоналарда жойлашган жанубий мамлакатларга хосдир. Аммо замбуруғ касалликлари ҳамма жойга тарқалмоқда, чунки улар антибиотиклардан фойдаланиш билан боғлиқ», — дейди мутахассис.