«Турон» клуби бош мураббийи Исломбек Исмоилов ўз аризасига кўра истеъфога чиқарилди. Бу ҳақда яйпанликлар клуби матбуот хизмати маълум қилди.
Суперлига 8-тури доирасида 13 май куни бўлиб ўтган «Турон» — «Қизилқум» учрашувидан (0:1) кейин жамоа раҳбарияти иштирокида йиғилиш бўлиб ўтган. Унда бош мураббий ўз аризасига кўра ишдан бўшаган.
Жамоани вақтинчалик польшалик мутахассис Богуслав Баниак бошқариб туради.
Маълумот учун, Суперлига дебютанти бўлган «Турон» клуби 8 турдан кейин 3 очко билан сўнгги ўринда бормоқда ва ҳали бирор марта ҳам ғалаба қозона олмади.
Шу тариқа бу Суперлига 2021 йилги мавсумида тўртинчи истеъфо бўлди. Аввалроқ «Навбаҳор» Нўмон Ҳасанов, «Металлург» Андрей Шипилов, «Андижон» эса Отабек Ғуломхўжаев билан хайрлашганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)